मस्कोमा ड्रोन हमला

एजेन्सी । रूसको राजधानी मस्कोतर्फ लक्षित गरेर ५९ वटा ड्रोन हमला गरिएको छ । ड्रोन हमलापछि पछि सोमबार केही समयका लागि त्यहाँका चार प्रमुख विमानस्थलको उडान सेवा प्रभावित भएको छ ।

मस्कोका मेयर सर्गेई सोब्यानिनले टेलिग्राममार्फत मस्कोतर्फ गइरहेका ५९ वटा ड्रोनलाई रूसी वायु प्रतिरक्षा प्रणालीले नष्ट गरेको जानकारी दिएका छन् । उनले ड्रोन कहाँबाट प्रक्षेपण गरिएको थियो भन्ने विषयमा भने कुनै स्पष्ट विवरण सार्वजनिक गरेका छैनन् ।

Advertisement

रूस र युक्रेनबीचको युद्ध जारी रहेका बेला पछिल्ला महिनाहरूमा युक्रेनले रूसी भू–भागभित्र ड्रोन आक्रमणलाई तीव्र बनाउँदै आएको छ । रूसले भने निरन्तर युक्रेनी सहरहरूमा मिसाइल र ड्रोन आक्रमण गर्दै आएको छ ।

सुरक्षालाई ध्यानमा राख्दै रूसी उड्डयन अधिकारीहरूले मस्कोका चारवटै प्रमुख विमानस्थल अस्थायी रूपमा बन्द गरेका थिए । अधिकारीहरूका अनुसार स्थानीय समयअनुसार बिहान ५ः३९ बजे विमानस्थलहरू पुनः सञ्चालनमा ल्याइएको छ ।

ड्रोन अवशेषका कारण कुनै ठूलो क्षति वा मानवीय हताहती भएको विषयमा भने तत्काल कुनै विवरण सार्वजनिक गरिएको छैन ।