एन्फा नेतृत्वलाई अदालतको हरियो संकेत

काठमाडौं । अखिल नेपाल फुटबल संघ (एन्फा)का पदाधिकारी तथा सदस्यहरूको विदेश भ्रमणमा लगाइएको रोक तत्काल कार्यान्वयन नगर्न उच्च अदालत पाटनले अन्तरिम आदेश दिएको छ ।

न्यायाधीशद्वय गणेशप्रसाद बराल र तेजेन्द्रप्रसाद शर्मा सापकोटाको संयुक्त इजलासले राष्ट्रिय खेलकुद परिषद् (राखेप)को सिफारिसका आधारमा अध्यागमन विभागले लगाएको यात्रा प्रतिबन्ध तत्काल लागू नगर्न आदेश जारी गरेको हो । राखेपको पत्रपछि अध्यागमन विभागले एन्फाका अध्यक्ष पंकजविक्रम नेम्बाङ, महासचिव किरण राईसहित अन्य पदाधिकारी र सदस्यहरूको विदेश यात्रामा रोक लगाएको थियो । त्यसविरुद्ध अध्यक्ष नेम्बाङ उच्च अदालत पुगेका थिए ।

Advertisement

अदालतले राखेपले विदेश भ्रमण रोक्न लेखेको पत्र तथा त्यससँग सम्बन्धित विभिन्न निकायबीच भएका पत्राचारसमेत हालका लागि कार्यान्वयन नगर्न अन्तरिम आदेश दिएको छ । एन्फामा संस्थागत आर्थिक अनियमितता भएको आरोपमा सम्बन्धित विषयमा अनुसन्धान भइरहेको छ । सोही अनुसन्धानलाई आधार बनाएर अध्यागमन विभागले पदाधिकारीहरूको विदेश यात्रा रोकेको थियो ।

यसअघि फिफा विश्वकपसँग सम्बन्धित कार्यक्रममा सहभागी हुन विदेश जान लागेका अध्यक्ष नेम्बाङ र महासचिव किरण राईलाई त्रिभुवन अन्तर्राष्ट्रिय विमानस्थलबाटै अध्यागमन कार्यालयले रोकेर फर्काएको थियो । अदालतले हरियो संकेत दिएसँगै उनीहरूको विदेश यात्रामाथि लगाइएको रोक तत्कालका लागि हटेको छ ।