‘मन्त्री नै हिँडेपछि कसलाई सुनाउने समस्या ?’ : खेलकुद सरोकारवालाको विरोध

विराटनगर । कोशी प्रदेश खेलकुद विकास बोर्डले विराटनगरमा आयोजना गरेको खेलकुद क्षेत्रका सरोकारवालासँग अन्तरक्रिया कार्यक्रममा मन्त्रीहरूको व्यवहारलाई लिएर सहभागीहरूले कडा आपत्ति जनाएका छन् । मन्त्रीहरूले आफ्नो मन्तव्य राखेर कार्यक्रम नसकिँदै बाहिरिएपछि सहभागी खेलकर्मी र निजी क्षेत्रका प्रतिनिधिहरू आक्रोशित बनेका हुन् ।

कार्यक्रममा कोशी प्रदेशका तीन मन्त्रीहरूको उपस्थिति थियो । सामाजिक विकास मन्त्री रामप्रसाद मेहता अध्यक्ष रहेको कार्यक्रमको प्रमुख अतिथि पूर्वाधार विकास मन्त्री प्रदीपकुमार सुनुवार र भूमि व्यवस्था, सहकारी तथा गरिबी निवारण मन्त्री इस्मायल अन्सारी विशिष्ट अतिथि रहेका थिए ।

Advertisement

कार्यक्रमको सुरुवातमै तीनै जना मन्त्रीले पालैपालो आफ्नो मन्तव्य राखेका थिए । मन्त्रीहरूको आफ्नो भनाइ सकिएसँगै सदन जानु पर्ने भन्दै कार्यक्रम स्थल छाड्न थालेपछि होहल्ला भएको थियो । सरोकारवालाका समस्या र सुझाव सुन्नुको साटो मन्तव्य राखेर मन्त्रीहरू कार्यक्रम स्थलबाट बाहिरिएपछि सहभागीहरूले होहल्ला गर्दै विरोध जनाएका हुन् ।

विराट गोल्ड कप फुटबल ट्रस्टका अध्यक्ष किशोर शाहीले मन्त्रीहरूको यस्तो व्यवहारप्रति सार्वजनिक रूपमै असन्तुष्टि व्यक्त गरे । उनले भने, ‘हामी हाम्रा समस्या, गुनासा र सुझाव सुनाउन यहाँ आएका हौँ । तर मन्त्रीज्यूहरू आफ्ना कुरा मात्र राखेर हिँड्नुभयो। अब हामीले हाम्रा कुरा कसलाई सुनाउने ? के यो केवल औपचारिकताका लागि मात्र गरिएको कार्यक्रम हो ?’

शाहीले खेलकुदको विकासका लागि निजी क्षेत्रसँग थुप्रै सुझाव र गुनासाहरू रहेको बताउँदै मन्त्रीहरूले सरोकारवालाका कुरा सुन्नका लागि धैर्यता देखाउनुपर्नेमा जोड दिए । शाहीको भनाइपछि कार्यक्रममा उपस्थित अन्य सहभागीहरूले पनि मन्त्रीहरूको कार्यशैलीप्रति असन्तुष्टि जनाउँदै केही बेर नाराबाजी र होहल्ला गरेका थिए ।

उनीहरूले कार्यक्रमको प्रमुख अतिथि मुख्यमन्त्री हिक्मतकुमार कार्की भनेर पत्र पठाएर सम्बन्ध नै नभएको र विभाग नै अलग भएका मन्त्रीलाई प्रमुख अतिथि बनाएर झुक्क्याउने भन्दै विरोध गरे । उनीहरूले यो बजेट सक्नका लागि औपचारिक कार्यक्रमको आयोजना गरेको आरोप लगाएका थिए । उनीहरूले वास्तविक खेलकुद क्षेत्रका समस्या सुन्ने र काम गर्ने सोच भएको भए मुख्यमन्त्री र सामाजिक मन्त्रीले कार्यक्रमलाई महत्त्व दिएर बस्नु पर्ने बताए ।

खेलकुद क्षेत्रका ख्यातिप्राप्त व्यक्तित्व र निजी क्षेत्रका प्रतिनिधिहरूले अन्तरक्रियाको अर्थ दुई पक्षीय संवाद हुनुपर्नेमा मन्त्रीहरूले ‘एकतर्फी भाषण’ गरेर अपमान गरेको महसुस भएको बताए । कार्यक्रममा सहभागीहरूले आगामी दिनमा यस्ता कार्यक्रमहरूमा सरोकारवालाको आवाज सुन्ने वातावरण मिलाउन आयोजकको ध्यानाकर्षण समेत गराएका छन् ।