समुद्रमा भेटियो कार्गो विमानको अवशेष, पाँच सदस्य अझै सम्पर्कविहीन

एजेन्सी । कराची बन्दरगाह नजिक अरब सागरमा बेपत्ता भएको कार्गो विमानको भग्नावशेष फेला परेको छ । विमानमा सवार चालक दलका पाँच सदस्यको खोजी जारी छ ।

पाकिस्तानी नौसेना र नागरिक खोज तथा उद्धार टोलीले करिब १२ घण्टाको खोजीपछि विमानका अवशेष पत्ता लगाएका हुन् । निजी वायुसेवा कम्पनी के–टु एयरवेजको उक्त विमान संयुक्त अरब इमिरेट्सको शारजाहबाट उडेको थियो । मंगलबार राति हवाई ट्राफिक नियन्त्रणसँग सम्पर्क विच्छेद हुनुअघि चालक दलले नेभिगेसन प्रणालीमा समस्या आएको जानकारी गराएका थिए ।

Advertisement

अधिकारीहरूका अनुसार मनसुनका कारण समुद्रमा प्रतिकूल मौसम र विशाल खोज क्षेत्रले उद्धार अभियानलाई कठिन बनाएको छ । प्रधानमन्त्रीले बेपत्ता चालक दलका परिवारप्रति समवेदना व्यक्त गर्दै खोज तथा उद्धारमा आवश्यक सबै स्रोत परिचालन गर्न निर्देशन दिएका छन् ।

वायुसेवा कम्पनीका अनुसार विमानमा क्याप्टेन मोहम्मद रिजवान इद्रिस, प्रथम अधिकृत फैसल जतोई, उडान इन्जिनियर मोहम्मद हमिद र मोहम्मद आरिफ सिद्दिकी तथा विमान लोडर मोहम्मद तौफिक खान सवार थिए ।

पाकिस्तान विमानस्थल प्राधिकरणका अनुसार विमान कराचीबाट करिब १५५ समुद्री माइल पश्चिम पुगेपछि सम्पर्कविहीन भएको थियो । राडार तथ्यांकले सम्पर्क टुट्नुअघि विमानले दिशा परिवर्तन गरेको र तीव्र रूपमा उचाइ घटाएको देखाएको छ ।

उड्डयन विज्ञहरूले दुर्घटनाको कारण अनुसन्धानपछि मात्र स्पष्ट हुने बताएका छन् । प्रारम्भिक सूचनाले प्राविधिक समस्या देखाए पनि यथार्थ कारण पत्ता लगाउन थप प्रमाण आवश्यक रहने उनीहरूको भनाइ छ ।