अर्जेन्टिनाका खेलाडीले  विश्वकप क्वार्टर फाइनलमा किन बाँधे कालो पट्टी 

काठमाडौं । फिफा विश्वकप २०२६ को क्वार्टर फाइनलमा स्विट्जरल्यान्डविरुद्ध मैदान उत्रँदा अर्जेन्टिनाका सबै खेलाडीको हातमा देखिएको ‘कालो पट्टी’ ले धेरै फुटबल समर्थकहरूको ध्यान खिच्यो । यो कुनै खेल रणनीति नभई अर्जेन्टिनाको फुटबलका महान् हस्ती तथा पूर्वकप्तान एन्टोनियो उबाल्डो राट्टिनको निधनमा अर्पण गरिएको विशेष श्रद्धाञ्जली र सम्मान थियो ।

अर्जेन्टिना फुटबल संघले फिफासँग विशेष अनुमति लिएपछि कप्तान लियोनेल मेस्सीसहितका खेलाडीहरू कालो पट्टी बाँधेर मैदानमा प्रवेश गरेका हुन् । ८९ वर्षको उमेरमा गत जुलाई ११ मा मस्तिष्क घातका कारण राट्टिनको निधन भएको थियो । उनको निधनले अर्जेन्टिनाको फुटबल जगत् मात्र नभई विश्व फुटबल नै शोकमा डुबेको छ ।
एन्टोनियो राट्टिन अर्जेन्टिनाको फुटबल इतिहासमा सबैभन्दा प्रभावशाली मिडफिल्डरतमध्ये एक मानिन्छन् । सन् १९५९ देखि १९६९ सम्म राष्ट्रिय टोलीको जर्सीमा ३४ अन्तर्राष्ट्रिय खेल खेलेका उनले १९६२ र १९६६ को विश्वकपमा देशको प्रतिनिधित्व गरेका थिए । सन् १९६६ को विश्वकपमा उनले अर्जेन्टिनी टोलीको कप्तानीसमेत गरेका थिए ।

Advertisement

क्लब फुटबलमा उनले आफ्नो सम्पूर्ण व्यावसायिक करियर अर्जेन्टिनाको चर्चित क्लब बोका जुनियर्समा बिताए । उनले बोकाका लागि चार वटा लिग उपाधि जित्दै क्लबको इतिहासमा अमिट छाप छोडेका छन् ।
फुटबल इतिहासमा राट्टिनको नाम एउटा ऐतिहासिक घटनासँग जोडिएको छ, जसले खेलको नियम नै परिवर्तन गरिदियो । सन् १९६६ को विश्वकपमा इंग्ल्यान्डविरुद्धको क्वार्टर फाइनल खेलमा जर्मन रेफ्री रुडोल्फ क्राइटलाइनले भाषागत असमझदारीका कारण उनलाई मैदानबाट बाहिर पठाएका थिए ।

त्यसबेला अहिलेको जस्तो रातो वा पहेँलो कार्ड देखाउने प्रचलन थिएन, रेफ्रीले बोलेरै खेलाडीलाई निष्कासन गर्थे । सो घटनाले विश्वभर ठूलो विवाद निम्त्याएपछि फिफाले खेलाडी र रेफ्रीबीचको सञ्चारलाई स्पष्ट पार्न सन् १९७० को विश्वकपदेखि पहेँलो र रातो कार्डको प्रणाली लागू गरेको थियो ।

यसरी फुटबल खेलमा आधुनिक नियम स्थापित गर्न जग बसाल्ने उनै महान् खेलाडीको योगदानलाई कदर गर्दै स्विट्जरल्यान्डविरुद्धको खेल सुरु हुनुअघि पनि विशेष सम्मान व्यक्त गरिएको थियो । अर्जेन्टिनी खेलाडीहरूले मैदानमा देखाएको यो सम्मानले राट्टिनको फुटबलप्रतिको समर्पण र इतिहासलाई पुनः एक पटक विश्वसामु ताजा गराएको छ ।