पौडी खेल्ने क्रममा बालकको डुबेर मृत्यु

विराटनगर । विराटनगर महानगरपालिका–१९ वैजनाथपुरस्थित खवास टोलमा रहेको पैनी खोलामा पौडी खेल्ने क्रममा डुबेर एक बालकको मृत्यु भएको छ । मृत्यु हुनेमा मोरङको ग्रामथान गाउँपालिका–२ बस्ने अश्विन सरदारका ९ वर्षीय छोरा प्रिन्स सरदार रहेको प्रहरीले जनाएको छ ।

प्रहरीका अनुसार आइतबार बिहान करिब ११ः२० बजेतिर पैनीमा पौडी खेल्ने क्रममा उनी अचानक डुबेर बेपत्ता भएका थिए । बालक डुबेर बेपत्ता भएको खबर दिउँसो १२ः ३० बजेतिर प्राप्त हुनासाथ प्रहरी चौकी घिनाघाट र सशस्त्र प्रहरी बल नेपाल ३ नं. गण मोरङ (टंकीसुनवारी) बाट खटिएको टोलीले खोजी कार्य सुरु गरेको थियो ।

प्रहरी र सशस्त्र प्रहरीको टोलीले खोजी गर्ने क्रममा दिउँसो २ बजेतिर बालकलाई पानीबाट बाहिर निकालेको थियो । उनलाई तत्काल उपचारका लागि विराटनगरस्थित कोसी अस्पताल पठाइएकोमा चिकित्सकले जाँचपछि मृत घोषणा गरेको प्रहरीले जनाएको छ । घटनाको सम्बन्धमा प्रहरीले थप अनुसन्धान थालेको जनाएको छ ।