इरान–अमेरिका तनाव चुलियो : जोर्डनमा अमेरिकी सैनिक मारिए, ट्रम्प परिवारलाई लक्षित होर्डिङ सार्वजनिक

काठमाडौं । इरान र अमेरिकाबीचको तनाव थप गहिरिँदै गएको छ । जोर्डनस्थित अमेरिकी सैन्य अड्डामाथि इरानले गरेको मिसाइल तथा ड्रोन आक्रमणमा दुई अमेरिकी सैनिक मारिएका छन् भने एक सैनिक अझै बेपत्ता छन् ।

यसैबीच, इरानको राजधानी तेहरानमा अमेरिकी राष्ट्रपति डोनाल्ड ट्रम्प र उनको परिवारलाई लक्षित गर्दै ‘रगतको बदलामा रगत’ भन्ने सन्देशसहितको विशाल होर्डिङ सार्वजनिक भएपछि दुई देशबीचको द्वन्द्व थप चर्किएको छ । अमेरिकी सेनाको सेन्ट्रल कमाण्ड (सेन्टकम)का अनुसार जुलाई १७ मा जोर्डनमा अमेरिकी तथा साझेदार सेनाले इरानी ब्यालेस्टिक मिसाइल र ड्रोन आक्रमणको प्रतिरक्षा गरिरहेका बेला दुई सैनिकको मृत्यु भएको हो । घटनामा चार सैनिक घाइते भएका थिए । उनीहरू उपचारपछि अस्पतालबाट डिस्चार्ज भइसकेका छन् भने सामान्य घाइते भएका अन्य सैनिक पुनः ड्युटीमा फर्किएका छन् ।

Advertisement

मारिएका सैनिकका परिवारलाई औपचारिक जानकारी नदिइएसम्म उनीहरूको परिचय सार्वजनिक नगरिने सेन्टकमले जनाएको छ । अमेरिकी सेनाका अनुसार इरानी आक्रमणबाट अमेरिकी सैनिकको ज्यान गएको यो पहिलो घटना हो ।

अमेरिकी राष्ट्रपति डोनाल्ड ट्रम्पले सैनिकको मृत्युलाई अत्यन्त दुःखद् घटना भन्दै उनीहरूले देशको सेवाका क्रममा सर्वोच्च बलिदान दिएको बताएका छन् । रक्षामन्त्री पिट हेगसेथले पनि सामाजिक सञ्जाल एक्समार्फत श्रद्धाञ्जली व्यक्त गर्दै उनीहरूको बलिदानले अमेरिकाको अठोट अझ बलियो बनाएको प्रतिक्रिया दिएका छन् ।

यसअघि इरानको इस्लामिक रिभोलुसनरी गार्ड कर्प्स (आईआरजीसी)ले जोर्डनको अल–अज्राकस्थित अमेरिकी सैन्य अड्डामाथि मिसाइल र ड्रोन आक्रमण गरेको र केही अमेरिकी सैन्य विमान पूर्ण रूपमा ध्वस्त पारेको दाबी गरेको थियो । यद्यपि, उक्त दाबी स्वतन्त्र रूपमा पुष्टि हुन सकेको छैन ।

अमेरिकी सेनाले आफ्ना सैनिकको मृत्यु भएपछि इरानविरुद्ध नयाँ हवाई आक्रमण सुरु गरिएको जनाएको छ । अमेरिकी सैन्य तथ्यांकअनुसार पछिल्लो चरणको इरान–अमेरिका द्वन्द्वमा ज्यान गुमाउने अमेरिकी सैनिकको संख्या १६ पुगेको छ ।

यता, इरानी अधिकारीहरूले पछिल्लो २४ घण्टामा अमेरिकी आक्रमणमा १२ इरानी नागरिक मारिएको दाबी गरेका छन् । यससँगै पछिल्लो चरणको द्वन्द्वमा इरानतर्फ मृत्यु हुनेको संख्या ५० पुगेको उनीहरूको भनाइ छ । होर्मोजगान प्रान्तका एक अधिकारीले अमेरिकी मिसाइल आक्रमणबाट समुद्री पानी प्रशोधन केन्द्र ध्वस्त भएको दाबी गरेका छन् । अमेरिकी सेनाले भने त्यसका बारेमा कुनै प्रतिक्रिया दिएको छैन ।

यही तनावका बीच तेहरानमा ट्रम्प, प्रथम महिला मेलानिया ट्रम्प तथा उनका पाँच सन्तानलाई अमेरिकी झण्डाले ढाकिएका शवपेटिकामाथि चित्रित गरिएको विशाल होर्डिङ सार्वजनिक गरिएको छ । होर्डिङमा फारसी भाषामा ‘रगतको बदलामा रगत’ भन्ने सन्देश लेखिएको छ भने पृष्ठभूमिमा जलिरहेको ह्वाइट हाउस देखाइएको छ ।

केही दिनयता ट्रम्पलाई लक्षित गरी तेहरानमा राखिएको यो दोस्रो ठूलो होर्डिङ हो । यसअघि एन्घेलाब चोकमा ट्रम्पलाई शवपेटिकाभित्र देखाइएको अर्को होर्डिङ राखिएको थियो । जसमा उनलाई मार्ने चेतावनीसमेत दिइएको गरिएको थियो ।

अन्तर्राष्ट्रिय सञ्चारमाध्यमहरूका अनुसार होर्डिङहरू इरानी सर्वोच्च नेता अली खामेनीको हत्यापछि प्रतिशोधको सन्देश दिन तयार पारिएका प्रचार सामग्रीको हिस्सा हुन् । इरानी नेतृत्वले दोषीमाथि बदला लिने चेतावनी दोहोर्याउँदै आएको छ ।

उता ट्रम्पले आफूमाथि कुनै आक्रमण वा हत्या प्रयास भए इरानमाथि अभूतपूर्व स्तरको सैन्य कारबाही गरिने चेतावनी यसअघि नै दिइसकेका छन् । पछिल्ला सैन्य गतिविधि, आक्रमण र सार्वजनिक चेतावनीहरूले अमेरिका–इरान सम्बन्ध थप तनावपूर्ण बन्दै गएको छ ।