जनप्रतिनिधिका ९५ पद रिक्त : स्थानीय तहमा उपनिर्वाचन नहुने, प्रदेशमा अन्याेल

काठमाडौं । मुलुकभर राष्ट्रिय सभा, प्रदेश सभा र स्थानीय तह गरी जनप्रतिनिधिका ९५ पद रिक्त भएका छन् । निर्वाचन आयोगका अनुसार ७५ स्थानीय तह, १९ प्रदेश सभा र राष्ट्रिय सभाको १ पद खाली भएकाे हाे ।

स्थानीय तहका ७५ रिक्त पदमा अब उपनिर्वाचन नहुने निश्चित भएको छ । कानुनअनुसार कार्यकाल एक वर्षभन्दा कम बाँकी रहेको अवस्थामा उपनिर्वाचन गर्न मिल्दैन । २०७९ मा निर्वाचित जनप्रतिनिधिहरूको पदावधि २०८४ वैशाखमा सकिने भएकाले ती पदहरू आगामी निर्वाचनसम्म रिक्त नै रहनेछन् ।

Advertisement

प्रदेश सभाका १९ पद रिक्त छन् । कार्यकाल ६ महिनाभन्दा बढी बाँकी रहेकाले त्यहाँ उपनिर्वाचन हुनुपर्ने कानुनी व्यवस्था छ, तर सरकार र आयोगले अहिलेसम्म मिति तोकेका छैनन् ।

राष्ट्रिय सभामा सुदूरपश्चिमबाट निर्वाचित एक सदस्य र राष्ट्रपतिबाट मनोनीत एक गरी दुई पद पनि रिक्त छन् ।

आयोगले राष्ट्रिय सभाको रिक्तताबारे सरकारलाई जानकारी गराइसकेको छ । निर्वाचन आयुक्तहरूको नियुक्ति र सरकारी प्रक्रियाका कारण उपनिर्वाचनको मिति तय हुन ढिलाइ भएको आयोगले जनाएको छ ।