इरान–अमेरिका तनाव उत्कर्षमा, ट्रम्पको कडा चेतावनीपछि मध्यपूर्वमा उच्च सतर्कता

एजेन्सी । इरान र अमेरिकाबीचको तनाव थप चर्किएको छ । इरानले जोर्डन, बहराइन र कुवेत आसपासका क्षेत्रमा मिसाइल तथा ड्रोन आक्रमण गरेपछि तनाव उत्कृर्षमा पुगेको हो ।

अमेरिकी राष्ट्रपति डोनाल्ड ट्रम्पले इरानमाथि अहिलेसम्मकै सबैभन्दा कडा सैन्य कारबाही हुन सक्ने चेतावनी दिएका छन् । इरानको इस्लामिक रिभोलुसनरी गार्ड्स (आईआरजीसी)ले कतार, कुवेत र ओमानमा रहेका अमेरिकी सैन्य अखडालाई लक्षित गरी मिसाइल प्रहार गरेको दाबी गर्दै त्यससम्बन्धी भिडियो सार्वजनिक गरेको छ ।

Advertisement

कुवेत–इराक सीमास्थित अल–अब्दली क्षेत्रमा पनि ड्रोन आक्रमण भएको जनाइएको छ । कुवेतको रक्षा मन्त्रालयका अनुसार आक्रमणबाट केही भौतिक क्षति भए पनि मानवीय क्षति भएको छैन । पछिल्ला दिनहरूमा यो क्षेत्र लगातार तनावग्रस्त बन्दै गएको छ ।

त्यस घटनापछि राष्ट्रपति ट्रम्पले सञ्चारमाध्यमसँग प्रतिक्रिया दिँदै इरानले अझै पर्याप्त मूल्य नचुकाएको टिप्पणी गरे । उनले इरानविरुद्ध ठूलो सैन्य कारबाहीका बारेमा आफू निर्णयको नजिक पुगेको भन्दै आवश्यक परे अमेरिका एक्लै पनि प्रतिकार गर्न सक्षम रहेको दाबी गरे । उनले इजरायलको सम्भावित सहभागिताका बारेमा पनि संकेत गरेका छन् ।

यता, बढ्दो सुरक्षा जोखिमलाई मध्यनजर गर्दै अमेरिकी विदेश मन्त्रालयले पश्चिम एसियामा रहेका आफ्ना नागरिकका लागि ट्राभल एड्भाइजरी जारी गरेको छ । मन्त्रालयले हवाई उडान जुनसुकै बेला प्रभावित हुन सक्ने र यात्रामा अवरोध आउन सक्ने चेतावनी दिँदै आपतकालीन अवस्थाका लागि तयारी अवस्थामा रहन आग्रह गरेको छ । मध्यपूर्वमा युद्धको जोखिम बढ्दै जाँदा क्षेत्रीय सुरक्षा अवस्था थप जटिल बन्दै गएको छ ।