अनैतिक गतिविधिमा संलग्न ४७ विदेशी महिला नेपालबाट निष्कासित

काठमाडौं । काठमाडौंका प्रमुख पर्यटकीय क्षेत्र ठमेल र दरबारमार्गमा अनैतिक गतिविधिमा संलग्न रहेको आरोपमा पक्राउ परेका ४७ जना विदेशी महिलालाई नेपालबाट निष्कासन (डिपोर्ट) गरिएको छ । जिल्ला प्रहरी परिसर काठमाडौंले शुक्रबार पत्रकार सम्मेलन गर्दै विशेष अपरेसनका क्रममा पक्राउ परेका ५७ विदेशी महिलामध्ये ४७ जनालाई अध्यागमन विभागमार्फत देश निकाला गरिएको जानकारी दिएको हो ।

परिसरका एसपी पवनकुमार भट्टराईका अनुसार निष्कासित गरिएका महिलाहरू युगान्डा, भियतनाम, थाइल्यान्ड, बंगलादेश, केन्या र इन्डोनेसिया लगायतका देशका रहेका छन् । पक्राउ परेका बाँकी १० जनामाथि भने थप अनुसन्धान भइरहेको प्रहरीले जनाएको छ ।

Advertisement

ठमेल र दरबारमार्ग जस्ता पर्यटकीय क्षेत्रमा विदेशी नागरिकहरू अनैतिक गतिविधिका लागि आउने गरेको गुनासो बढेपछि प्रहरीले विशेष अभियान सञ्चालन गरेको थियो । ‘केही विदेशी नागरिकले नेपालमा सस्तो जीवनयापन र रात्रिकालीन गतिविधिको अवसर रहेको भन्दै यस्ता गलत क्रियाकलापमा संलग्न हुने गरेको पाइएको छ,’ एसपी भट्टराईले भने ।

पत्रकार सम्मेलनमा प्रहरीले अनलाइन बेटिङ (जुवा) सम्बन्धी गतिविधिमा संगठित गिरोह सक्रिय रहेको र त्यसमाथि कडा निगरानी बढाइएको जानकारी दिएको छ । बेटिङमार्फत संकलित रकम अवैध हुण्डी र क्रिप्टोकरेन्सीमार्फत विदेश पठाउने गरिएको प्रहरीको अनुसन्धानले देखाएको छ । हाल प्रहरीले बेटिङ वेबसाइटहरूको निगरानी गर्नुका साथै यसमा संलग्न नेटवर्क र आर्थिक कारोबारको सूक्ष्म अनुसन्धान गरिरहेको छ ।

यसैगरी, सार्वजनिक सेवा प्रवाह हुने सरकारी कार्यालयहरूमा सर्वसाधारणलाई दुःख दिने र अवरोध पुर्‍याउने बिचौलियाविरुद्ध पनि प्रहरी आक्रामक रूपमा प्रस्तुत भएको छ । काठमाडौं प्रहरीले हालसम्म ३०९ जना बिचौलियालाई पक्राउ गरेको छ । पक्राउ परेकामध्ये ६१ जनामाथि मुद्दा दर्ता गरी कानुनी कारबाही प्रक्रिया अघि बढाइएको एसपी भट्टराईले जानकारी दिए ।

पर्यटकीय क्षेत्रको सुरक्षा र मर्यादा कायम राख्न तथा अवैध आर्थिक कारोबार र बिचौलियाको जालो तोड्न प्रहरीले आफ्नो अभियानलाई निरन्तरता दिने प्रतिबद्धता जनाएको छ ।