झापाको बुद्धशान्तिमा खुला हाफ म्याराथन हुँदै

बिर्तामोड । झापाको बुद्धशान्तिमा आयोजना हुने खुला हाफ म्याराथन प्रतियोगिताको तयारी अन्तिम चरणमा पुगेको छ । बर्खा स्मृति प्रतिष्ठानको आयोजनामा साउन १९ गते हुन लागेको प्रतियोगितामा सहभागी हुन इच्छुकले अनलाइन फाराम भर्ने म्याद आज साउन १० गतेसम्म राखिएको छ ।

एथलेटिक्स खेलाडीहरूलाई प्रोत्साहन गर्ने उद्देश्यले बुद्धशान्तिमै पहिलोपटक यो हाफ म्याराथन आयोजना गर्न लागिएको प्रतिष्ठानका अध्यक्ष मदनकुमार प्रसाईंले बताए । प्रतिष्ठानले यसअघि दुई संस्करण अन्तरपालिका जिल्लास्तरीय क्रिकेट प्रतियोगिता आयोजना गरेको भए पनि यसपल्ट खेल मैदानको अभावका कारण हाफ म्याराथन आयोजना गर्न लागिएको उनले जानकारी दिए ।

Advertisement

२१ किलोमिटर दूरीको यो प्रतियोगितामा नेपाल र भारतका गरी कम्तीमा ४ सय जना धावक सहभागी गराउने लक्ष्य आयोजकले लिएको छ । प्रतियोगिता बुद्धशान्ति गाउँपालिकाको प्राङ्गणबाट सुरु भई पुलचोकस्थित हडियाको पुल, उत्तरपूर्वबाट बुद्धशान्ति-४ मङ्गलबारे, मदन भण्डारी राजमार्ग हुँदै बुद्धशान्ति-१ नमुना भोटेटार चोक, होक्से चोक, जयपुर र बुधबारे चोक भएर पुनः गाउँपालिका प्राङ्गणमै पुगेर टुंगिनेछ ।

प्रतियोगिताका विजेताले नगद ५० हजार रुपैयाँ पाउनेछन् । त्यसैगरी दोस्रो हुनेले ४० हजार, तेस्रोले ३० हजार, चौथोले २० हजार र पाँचौँ हुनेले नगद १० हजार रुपैयाँसहित ट्रफी प्राप्त गर्नेछन् । विजयी धावकहरूलाई आयोजकका तर्फबाट एक वर्षका लागि जीवन बीमा समेत गरिदिने व्यवस्था मिलाइएको छ ।