११ औँ एसियाली आईटीएफ तेक्वान्दोमा नेपालको सहभागिता

विराटनगर । मंगोलियामा आयोजना हुन लागेको ११ औँ एसियाली आईटीएफ तेक्वान्दो प्रतियोगितामा नेपालले आफ्नो बलियो उपस्थिति जनाउने भएको छ । आगामी साउन १८ देखि २४ गतेसम्म सञ्चालन हुने उक्त अन्तर्राष्ट्रिय प्रतियोगितामा सहभागी हुन नेपालबाट तीन सदस्यीय टोली त्यसतर्फ प्रस्थान गर्न लागेको हो ।

प्रतियोगितामा सहभागी हुने टोलीलाई बिहीबार विराटनगरमा आयोजित एक कार्यक्रमका बीच कोशी प्रदेश खेलकुद विकास बोर्ड सदस्यसचिव विप्लव घोषले बिदाइ गर्दै शुभकामना व्यक्त गरे । उनले नेपाली टोलीले पदक जितेर फर्कने विश्वास व्यक्त गर्दै यसले प्रदेश र समग्र राष्ट्रकै खेलकुद क्षेत्रमा नयाँ उत्साह थप्ने बताए ।

नेपाली टोलीमा नेपाल अन्तर्राष्ट्रिय तेक्वान्दो महासंघका अध्यक्ष प्रवीणकुमार कार्की, महासचिव घमबहादुर थापा मगर र प्रतिभाशाली खेलाडी शेखर थापा रहेका छन् । राष्ट्रिय खेलकुद परिषद् (राखेप) ले औपचारिक बिदाइ गरे पश्चात् टोली आगामी आइतबार (साउन १७ गते) मंगोलियातर्फ प्रस्थान गर्ने छ ।

सात दिनसम्म चल्ने उक्त प्रतियोगिता खेल कौशल प्रदर्शनमा मात्र सीमित नभई प्राविधिक रूपमा पनि महत्त्वपूर्ण रहने महासंघका अध्यक्ष कार्कीले जानकारी दिए । उनका अनुसार प्रतियोगिताको उद्घाटनसँगै पहिलो दिन अम्पायरहरूका लागि ‘सेमिनार कोर्स’ सञ्चालन हुनेछ । सोही दिन साँझ एसियन आईटीएफ तेक्वान्दो फेडेरेसनको ‘कंग्रेस अधिवेशन’ समेत आयोजना हुनेछ, जसमा नेपालको तर्फबाट सक्रिय सहभागिता रहनेछ ।

अन्तर्राष्ट्रिय मञ्चमा देशको झन्डा फहराउने र पदक जितेर राष्ट्रको शिर उच्च बनाउने लक्ष्यसहित टोलीले आफ्नो तयारी तीव्र पारेको अध्यक्ष कार्कीले बताए ।