सामाजिक सद्भाव कायम राख्न विराटनगरमा शुक्रबार ‘सद्भाव र्‍याली’ निकालिने

विराटनगर । सामाजिक एकता र धार्मिक सहिष्णुतालाई मजबुत बनाउने उद्देश्यले मोरङको विराटनगरमा शुक्रबार ‘सद्भाव र्‍याली’ आयोजना गरिने भएको छ । जिल्ला प्रशासन कार्यालय मोरङले बिहीबार मोरङ उद्योग व्यापार संघको सभाहलमा आयोजना गरेको सर्वदलीय बैठकले उक्त निर्णय गरेको हो ।

हालैका केही घटनाक्रमले सदियौंदेखि कायम रहेको हिन्दु र मुस्लिम समुदायबीचको सामाजिक एकता र धार्मिक सद्भावमा खलल पुर्‍याउन खोजेको निष्कर्ष निकाल्दै बैठकले त्यसको कडा निन्दा गरेको छ । सामाजिक र धार्मिक सद्भाव कायम गराउन तथा शान्ति सुरक्षालाई थप मजबुत बनाउन सबै पक्षले सुरक्षा निकायलाई पूर्ण सहयोग गर्ने प्रतिबद्धता समेत जनाएका छन् ।

Advertisement

मोरङका प्रमुख जिल्ला अधिकारी (सीडीओ) युवराज कट्टेलले शुक्रबार आयोजना गरिने सद्भाव र्‍यालीमा सबै राजनीतिक दल, नागरिक समाज, धार्मिक संघ–संस्था र सर्वसाधारणको उत्साहजनक सहभागिता रहने जानकारी दिए । ‘विराटनगरको विशिष्ट पहिचानको रूपमा रहेको सामाजिक एकतालाई जोगाउन यो र्‍याली कोसेढुंगा सावित हुनेछ,’ उनले भने ।

सर्वदलीय बैठकमा सुरक्षा निकायका प्रमुखहरू, विभिन्न राजनीतिक दलका प्रतिनिधिहरू, स्थानीय तहका प्रमुख तथा उपप्रमुखहरू, धार्मिक संघ–संगठनका प्रतिनिधिहरू, उद्योगी–व्यवसायी र युवाहरूको बाक्लो उपस्थिति रहेको थियो ।

बैठकमा सहभागीहरूले जिल्ला प्रशासन कार्यालय मोरङले पछिल्लो समय मठ, मन्दिर, मस्जिद लगायतका धार्मिक स्थलहरूमा राखिएका माइक तथा लाउडस्पिकरहरू बाहिर बजाउन निषेध गर्ने गरी गरेको निर्णयको स्वागत गरेका छन् । ध्वनि प्रदूषण नियन्त्रण र सामाजिक शान्ति कायम गर्न यो कदम सकारात्मक रहेको सहभागीहरूको धारणा थियो ।

प्रशासनले धार्मिक तथा सामाजिक सद्भाव बिगार्ने खालका गतिविधि नगर्न र कुनै पनि उक्साहटमा नलाग्न सम्पूर्ण जिल्लाबासीलाई आग्रह समेत गरेको छ ।