अपुष्ट सूचनाको भरमा उद्योगीलाई आतंकित पारिएको भन्दै व्यावसायिक संगठनद्वारा विरोध

विराटनगर । विराटनगरको प्रतिष्ठित व्यावसायिक घराना ‘देवेनरा ग्रुप’ को घर तथा व्यवसायमा नेपाल प्रहरीले गरेको छापा मार्ने शैलीप्रति कोशी प्रदेशका उद्योगी व्यवसायीहरूले गम्भीर आपत्ति जनाएका छन् ।

शनिबार बिहानैदेखि सडक घेराबन्दी गरी करिब ५ घण्टासम्म गरिएको छापामा कुनै पनि गैरकानुनी वस्तु वा प्रमाण फेला नपरेपछि निजी क्षेत्रले प्रहरीको सूचना संयन्त्रको विश्वसनीयतामाथि नै प्रश्न उठाएको छ ।
नेपाल उद्योग वाणिज्य महासंघ कोशी प्रदेश, नेपाल उद्योग परिसंघ कोशी प्रदेश, मोरङ उद्योग व्यापार संघ र उद्योग संगठन मोरङले संयुक्त प्रेस विज्ञप्ति जारी गर्दै उक्त घटनाको भर्त्सना गरेका हुन् ।

Advertisement

उनीहरूले जारी गरेको विज्ञप्तिमा भनिएको छ, ‘प्रहरीकै प्रेस विज्ञप्ति अनुसार कुनै पनि गैरकानुनी वस्तु फेला नपर्नुले प्रहरीको सूचना संयन्त्र कति फितलो छ भन्ने प्रमाणित भएको छ । बिहान ४ः३० बजेदेखि नै ठुलो संख्यामा सुरक्षाकर्मी परिचालन गरी उद्योगीलाई आतंकित पार्ने शैलीमा गरिएको यो कार्य निन्दनीय छ ।’

व्यवसायीहरूले कानुन कार्यान्वयन राज्यको दायित्व भए तापनि नागरिकको सम्मान, सामाजिक प्रतिष्ठा र व्यावसायिक साखलाई ख्यालै नगरी गरिएको यस्तो कारबाहीले निजी क्षेत्रलाई हतोत्साहित बनाएको उल्लेख गरेका छन् ।

सरकारले एकातिर लगानीमैत्री वातावरण र निजी क्षेत्रसँगको सहकार्यको कुरा गर्ने तर अर्कोतिर अपराधीलाई जस्तो व्यवहार गरी छापामार शैली अपनाउने कार्यले सरकारको नीति र व्यवहारबीच विरोधाभास देखिएको उद्योगीहरूको ठहर छ । यस्ता गतिविधिले सरकार र निजी क्षेत्रबीच अविश्वास मात्र बढाउने नभई आर्थिक गतिविधि विस्तारमा समेत प्रतिकूल प्रभाव पार्ने चेतावनी विज्ञप्तिमा दिइएको छ ।

कोशी प्रदेशका चार ठुला व्यावसायिक संस्थाहरूले यस्ता संवेदनशील कारबाही अघि प्रयोग गरिने सूचनाको विश्वसनीयता र प्रमाणिकतामाथि गम्भीर पुनरावलोकन गर्न सरकारसँग माग गरेका छन् । अपुष्ट सूचनाको भरमा निर्दोष व्यवसायीको मानमर्दन हुँदा राष्ट्रको अर्थतन्त्रमा नै दूरगामी असर पर्ने उनीहरूको भनाइ छ ।

‘उद्योग र वाणिज्य क्षेत्र देशको अर्थतन्त्रको मेरुदण्ड हो । यस क्षेत्रलाई शंकाको दृष्टिले होइन, सहकार्य, पारदर्शिता र कानुनी सुनिश्चितताको वातावरणमा अघि बढाउन हामी नेपाल सरकारसँग जोडदार माग गर्दछौँ,’ विज्ञप्तिमा भनिएको छ ।