झापामा स्क्रब टाइफसको उच्च जोखिम: बिर्तामोडमा मात्रै ५९८ सङ्क्रमित

झापा । झापामा पछिल्लो समय ‘स्क्रब टाइफस’ को सङ्क्रमण बढ्दै गएको छ । आर्थिक वर्ष २०८२ / ८३ को तथ्यांक अनुसार जिल्लाका विभिन्न स्वास्थ्य संस्थामा उपचारका लागि आएका बिरामीमध्ये ६९६ जनामा यसको सङ्क्रमण पुष्टि भएको छ ।

स्वास्थ्य कार्यालय झापाका अनुसार जिल्लाका १५ वटा स्थानीय तहमध्ये बिर्तामोड नगरपालिका सङ्क्रमणको मुख्य ‘हटस्पट’ बनेको छ । कार्यालयको तथ्यांकको आधारमा सबैभन्दा बढी बिर्तामोड नगरपालिकामा ५९८ जनामा सङ्क्रमण देखिएको हो ।

Advertisement

यस्तै, दमक नगरपालिकामा ४३, मेचीनगरमा २५, कमल गाउँपालिकामा १६, कनकाई नगरपालिकामा ६, हल्दीबारी गाउँपालिकामा ५, झापा गाउँपालिकामा २ र भद्रपुर नगरपालिकामा १ जनामा सङ्क्रमण पुष्टि भएको स्वास्थ्य कार्यालयले जनाएको छ ।

स्क्रब टाइफस सङ्क्रमित माइट (किर्ना)को टोकाइबाट मानिसमा सर्ने रोग हो । यसबाट ज्यानै जाने जोखिम हुन्छ । यो रोग लाग्दा उच्च ज्वरो, टाउको तथा शरीर दुख्ने, खोकी, वान्ता, पेट दुख्ने, पखाला लाग्ने, श्वासप्रश्वासमा समस्या हुने तथा टोकेको स्थानमा कालो दाग देखिन सक्ने लक्षण देखा पर्न सक्छ । खेतबारी, झाडी वा वन क्षेत्रमा जाँदा लामो बाहुला भएको कपडा र उपयुक्त जुत्ता लगाउने, शरीरको खुला भागमा कीटनाशक मलम प्रयोग गर्ने तथा घर वरपरको वातावरण सफा राखी झाडी बढ्न नदिनेलगायत सावधानी अपनाउन सबैमा स्वास्थ्य कार्यालयले आग्रह गरेको छ ।

स्वास्थ्य सेवा विभागअन्तर्गतको इपिडिमियोलोजी तथा रोग नियन्त्रण महाशाखाको कीटजन्य शाखाका अनुसार नेपालमा स्क्रब टाइफसका सङ्क्रमितको संख्या प्रत्येक वर्ष बढ्दै गएको छ ।