२०८३ श्रावण २१, बिहीबार ०८:०४
विराटनगर । मोरङको धनपालथान गाउँपालिका–७ मा मोटरसाइकलको ठक्करबाट घाइते भएकी एक वृद्धाको उपचारका क्रममा मृत्यु भएको छ ।
धनपालथान गाउँपालिका–७ कदमाहास्थित भित्री सडक खण्डमा कदमाहाबाट नोचातर्फ जाँदै गरेको को ३३ प ८९५३ नम्बरको मोटरसाइकलले बाटो काट्दै गरेकी ७० वर्षीया चुम्नीदेवी मण्डललाई ठक्कर दिएको प्रहरीले जनाएको छ । प्रहरीका अनुसार बुधबार राति मोटरसाइकलको ठक्करबाट मण्डलको टाउको र अनुहारमा गम्भीर चोट लागेको थियो ।
गम्भीर घाइते भएकी मण्डललाई तत्काल उपचारका लागि विराटनगरस्थित न्युरो अस्पताल लगिएको थियो । उनको उपचारकै क्रममा बिहीबार बिहान ४ः०५ बजेतिर मृत्यु भएको प्रहरीले जनाएको छ । मृतकको शव अहिले अस्पतालमै राखिएको छ ।
दुर्घटनामा संलग्न मोटरसाइकल चालक धनपालथान–१ नोचाका १७ वर्षीय धिरज मण्डललाई प्रहरीले नियन्त्रणमा लिएको छ । दुर्घटनामा परेको मोटरसाइकललाई प्रहरी चौकी गडेरियामा राखिएको छ भने घटनाबारे थप कानुनी अनुसन्धान अगाडि बढाएको प्रहरीले जनाएको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी