सम्पत्ति शुद्धीकरण मुद्दामा  ‘चक्रे मिलन’ दम्पतीलाई सर्वोच्चको सफाइ

काठमाडौं । गुण्डागर्दीमार्फत अवैध रूपमा सम्पत्ति आर्जन गरेको (सम्पत्ति शुद्धीकरण) अभियोग लागेका मिलन गुरुङ  ‘चक्रे मिलन’ र उनकी श्रीमती इन्दिरा घले गुरुङलाई सर्वोच्च अदालतले सफाइ दिएको छ । न्यायाधीशहरू अब्दुल अजीज मुसलमान र मेघराज पोखरेलको संयुक्त इजलासले विशेष अदालतको आठ वर्षअघिको फैसलालाई सदर गर्दै उनीहरूलाई सफाइ दिने निर्णय गरेको हो ।

सम्पत्ति शुद्धीकरण अनुसन्धान विभागले मिलन गुरुङ र उनकी श्रीमतीमाथि ७ करोड ८ लाख रुपैयाँ गैरकानुनी रूपमा आर्जन गरेको दाबी गर्दै मुद्दा दायर गरेको थियो । गुण्डागर्दी र असुली जस्ता आपराधिक क्रियाकलापबाट उक्त सम्पत्ति जोडेको विभागको जिकिर थियो ।
यसअघि विशेष अदालतले १० माघ २०७४ मा उनीहरूलाई निर्दोष ठहर गर्दै सफाइ दिएको थियो । तर, विशेष अदालतको उक्त फैसला चित्त नबुझेपछि विभागले सर्वोच्च अदालतमा पुनरावेदन गरेको थियो ।

Advertisement

सर्वोच्चले पनि विशेष अदालतको फैसलामा कुनै त्रुटि नदेखिएको भन्दै सोही निर्णयलाई सदर गरेपछि मिलन गुरुङ दम्पतीले यो मुद्दाबाट पूर्ण रूपमा सफाइ पाएका छन् ।