मोरङ कारागारमा खानतलासी, कैदीबन्दीको स्थानान्तरण तयारीपछि नाराबाजी र प्रदर्शन

विराटनगर । विराटनगर महानगरपालिका–८ स्थित जिल्ला कारागार मोरङमा आज (सोमबार) बिहानैबाट खानतलासी सुरु भएको छ ।

मोरङका प्रमुख जिल्ला अधिकारी युवराज कटेल, मोरङ प्रहरी प्रमुख एसपी कवित कटवाल लगायत जिल्ला सुरक्षा समितिका पदाधिकारीको उपस्थितिमा कारागारमा बिहान ४ः३० बजेदेखि खानतलासी सुरु भएको हो । लागुऔषध लगायतका अवैध वस्तु राख्ने गरिएको विशेष सूचनाका आधारमा ठूलो संख्यामा सुरक्षाकर्मी परिचालन गरेर खानतलासी गरिएको हो ।

एसपी कटवालले खानतलासी नियमित भएको बताए । ‘कारागारमा बेला–बेला खानतलासी र सर्च गर्ने गरिएको छ । अहिले त्यसैलाई निरन्तरता दिइएको हो । यो नियमित प्रक्रिया हो,’ उनले भने । यो समाचार तयार पार्दासम्म कारागारबाट कुनै अवैध वस्तु फेला परेको जानकारी भने छैन ।

खानतलासीसँगै कारागारका केही कैदीबन्दीको स्थानान्तरणको तयारी गरिएको थियो । विशेष गरेर आपराधिक पृष्ठभूमिका अभिषेक गिरीसँग निकट रहेकाहरूलाई अन्यत्र कारागारमा सार्न खोजिएको सुरक्षा स्रोतले बतायो । स्रोतका अनुसार कारागारभित्र रहेर अभिषेक गिरीलाई सहयोग गरिरहेका १५ जनाभन्दा बढी कैदीबन्दीलाई सार्न खोजिएको छ ।

तर, कारागारमा खानतलासी सुरु भएसँगै (बी) ब्लकका कैदीबन्दी आन्दोलित भएका छन् । खानतलासीसँगै कैदीबन्दीको स्थानान्तरण गर्ने तयारी भइरहेको बुझेपछि त्यसको विरोधमा उनीहरू प्रदर्शन र नाराबाजीमा उत्रिएका हुन् । उनीहरू कारागारभित्रै आगो बालेर विरोधमा उत्रिएका थिए । तर, दमकलको सहयोगमा आगो निभाइएको थियो ।

यो समाचार तयार पार्दासम्म नाराबाजी र प्रदर्शन भइरहेको छ । आन्दोलनमा उत्रिएका कैदीबन्दीले (बी) ब्लकमा सुरक्षाकर्मीलाई प्रवेश गर्न दिइरहेका छैनन् । भित्रबाट तालाबन्दी गरेर उनीहरूले प्रदर्शन र नाराबाजी गरिरहेका हुन् । यद्यपि, बल प्रयोग गरेर भए पनि भित्र प्रवेश गर्ने र गिरीलाई सहयोग गरिरहेका कैदीबन्दीलाई स्थानान्तरण गर्ने तयारी रहेको स्रोतले बतायो ।

मोरङ कारागारका कैदीबन्दीले लत्ताकपडाबापत पाउँदै आएको सरकारी भत्ता कब्जा गरेको आरोपमा यसअघि असार १३ गते गिरी पक्राउ परेका थिए । आपराधिक विश्वासघात, ठगी मुद्दामा सीआईबी र जिल्ला प्रहरी कार्यालय मोरङले अलगअलग अनुसन्धानमा परेका उनी लामो समयदेखि आपराधिक धन्दामा संलग्न रहेको प्रहरीले जनाएको छ । तर, आपराधिक विश्वासघात, ठगी मुद्दामा जाहेरवालासँग सहमति गरेर उनी छुटिसकेका छन् । कारागारसँग जोडिएको घटनामा भने अनुसन्धान जारी छ ।

प्रहरीको हालसम्मको अनुसन्धानबाट कैदीबन्दीको सहयोगमा गिरीले कारागारभित्र पहुँच पुर्‍याउने गरेको पत्ता लागेको छ । उनैलाई सहयोग गर्दै आएकाहरूलाई अन्यत्र कारागार स्थानान्तरण गर्न खोजिएको सुरक्षा स्रोतले बतायो ।