उद्योगीका समस्या समाधान गर्न सांसद मनिष झाको प्रतिबद्धता

विराटनगर । उद्योग संगठन मोरङको आयोजनामा सत्तारुढ दलका सांसद मनिष झासँग उद्योग–व्यवसाय क्षेत्रका समसामयिक समस्या, चुनौती तथा आर्थिक गतिविधि विस्तारका विषयमा छलफल भएको छ ।

कार्यक्रममा संगठनका अध्यक्ष नन्दकिशोर राठीले उद्योग तथा व्यवसाय क्षेत्र मुलुकको अर्थतन्त्रको प्रमुख आधार स्तम्भ भएको बताए । उनले निजी क्षेत्रले उठाउँदै आएका समस्याहरूलाई सरकारको सम्बन्धित निकायसम्म पुर्‍याएर समाधानका लागि पहल गरिदिन सांसद झासँग आग्रह गरे ।

Advertisement

अध्यक्ष राठीले नीतिगत स्थिरता, पूर्वानुमानयोग्य कानुनी व्यवस्था र लगानीमैत्री वातावरण निर्माणमा जोड दिए ।
सो अवसरमा सांसद मनिष झाले उद्योग तथा व्यवसाय क्षेत्रलाई अर्थतन्त्रको महत्त्वपूर्ण खम्बाका रूपमा लिँदै निजी क्षेत्रका समस्या समाधानका लागि आफूले गम्भीरतापूर्वक पहल गर्ने प्रतिबद्धता व्यक्त गरे । उनले भने, ‘लगानीकर्ताको मनोबल बढाउन र उद्योग क्षेत्रका समस्या सुल्झाउन म सहजीकरण गर्नेछु । जलविद्युत, पर्यटन र कृषिमा रहेका सम्भावनालाई व्यवहारमा उतार्न सरकार र निजी क्षेत्रबीच सहकार्य आवश्यक छ ।’

संगठनका निवर्तमान अध्यक्ष राकेश सुरानाले मुलुकको दिगो विकासका लागि कृषिको आधुनिकीकरण र व्यवसायीकरणलाई प्राथमिकता दिनुपर्ने सुझाव दिए । उनले उत्पादन लागत घटाउने र कृषि उत्पादनलाई उद्योग तथा बजारसँग जोड्ने नीति आवश्यक रहेको उल्लेख गरे ।

छलफलमा सहभागी अन्य उद्योगी–व्यवसायीहरूले बैंकको तरलतालाई उत्पादनमूलक क्षेत्रमा प्रवाह गर्नुपर्ने, बजारको माग बढाउनुपर्ने, कर नीतिमा स्थिरता कायम गर्नुपर्ने र विद्युत महसुलमा लगाइएको भ्याट हटाउनुपर्ने जस्ता मागहरू राखेका थिए ।