सेयर बजारमा सामान्य सुधार: ४ अर्ब ४० करोडको कारोबार

काठमाडौं । साताको चौथो कारोबार दिन बिहीबार नेपाल स्टक एक्सचेन्ज (नेप्से) परिसूचकमा सामान्य सुधार देखिएको छ । अघिल्ला दिनहरूमा उतारचढाव देखिएको बजारमा आज ७.१७ अंकको वृद्धि भई परिसूचक २६२९.४० विन्दुमा पुगेर बन्द भएको छ ।

बिहीबार बजारमा कुल ३४५ कम्पनीका ९५ लाख कित्ता सेयर किनबेच भएका छन् । यसबाट कुल ४ अर्ब ४० करोड १४ लाख रुपैयाँ बराबरको कारोबार भएको छ ।

Advertisement

आजको बजारमा एउटा रोचक दृश्य देखिएको छ । मूल्य बढ्ने र घट्ने कम्पनीहरूको सङ्ख्या ठ्याक्कै बराबर रहेको छ । कुल १३२ कम्पनीको सेयर मूल्य बढ्दा १३२ वटै कम्पनीको मूल्यमा गिरावट आएको छ भने १३ कम्पनीको मूल्य स्थिर रहेको नेप्सेले जनाएको छ ।

आज दुई वटा कम्पनीको सेयर मूल्यमा सकारात्मक सर्किट लागेको छ ।  माउन्ट एभरेस्ट पावर डेभलपमेन्ट र सर्वोत्तम सिमेन्ट (पेन्ट्स) को सेयर मूल्य सर्वाधिक १४.९९ प्रतिशतले बढेको छ । यसका साथै कुमारी धन वृद्धि योजना र कुमारी इक्विटी फण्डको मूल्यमा पनि ९ प्रतिशतभन्दा बढीको सुधार देखिएको छ ।

कारोबार रकमका आधारमा आज एडीबीएल बैंक डिबेन्चर २०८७ शीर्ष स्थानमा रह्यो । यसको ५० करोड ६५ लाख रुपैयाँ बराबरको खरिद–बिक्री भयो । त्यस्तै, रिलायन्स स्पिनिङ मिल्स ३० करोड ४ लाख र सोलु हाइड्रोपावर २२ करोड ९८ लाख रुपैयाँको कारोबार सहित क्रमशः दोस्रो र तेस्रो स्थानमा रहे ।
बजारमा सामान्य अंकको सुधार आएसँगै लगानीकर्ताहरूमा केही उत्साह देखिएको छ, यद्यपि कारोबार रकम भने अघिल्ला दिनहरूको तुलनामा सन्तुलित नै देखिएको छ ।