पाँचथरमा सम्बन्ध विच्छेदको लहरः आधाभन्दा बढी मुद्दा  ‘डिभोर्स’ कै

पाँचथर । पाँचथर जिल्ला अदालतमा दर्ता हुने मुद्दामध्ये आधाभन्दा बढी सम्बन्ध विच्छेदका पाइएका छन् । अदालतको तथ्यांक अनुसार जिल्लामा पारिवारिक विखण्डनको दर डरलाग्दो गरी बढ्दै गएको छ ।

गत आर्थिक वर्ष २०८२/०८३ मा दर्ता भएका कूल ६०९ नयाँ मुद्दामध्ये ३८४ वटा (करिब ६३ प्रतिशत) सम्बन्ध विच्छेदका रहेका छन् । अघिल्लो आव २०८१/०८२ बाट सरेर आएका ८७ मुद्दासहित गत वर्ष कूल ४७१ वटा सम्बन्ध विच्छेदका मुद्दा सुनुवाइको सूचीमा थिए । यो सङ्ख्या अघिल्लो वर्षको तुलनामा ५ प्रतिशतले बढेर कूल मुद्दाको ५६ प्रतिशत पुगेको अदालतकी सूचना अधिकारी सरस्वती नेम्बाङले जानकारी दिइन् ।

Advertisement

अदालतमा पुग्ने मुद्दाहरूको प्रकृति अनौठो देखिन्छ । गत वर्ष ७३ वर्षीय वृद्ध श्रीमान् र ५९ वर्षीया श्रीमतीदेखि डेढ वर्षको बच्चा भएका युवा दम्पतीसम्म सम्बन्ध विच्छेदका लागि अदालत पुगेका छन् । ४७१ मध्ये १६७ मुद्दा मेलमिलाप प्रक्रियाबाट टुंगिए पनि अधिकांशको नतिजा सम्बन्ध विच्छेद नै रहेको अदालतले जनाएको छ ।

सम्बन्ध विच्छेद बढ्नुको एउटा मुख्य कारण कानुनी प्रक्रिया मिलाउने चाहना पनि रहेको पाइएको छ । सूचना अधिकारी नेम्बाङका अनुसार करिब एक तिहाइ मुद्दामा अर्को विवाह गरिसकेका व्यक्तिहरूले कागजी प्रमाण मिलाउन मात्रै अदालती प्रक्रिया अपनाउने गरेका छन् ।

यसरी बर्सेनि सम्बन्ध विच्छेदका मुद्दा बढ्दै जाँदा समाजमा पारिवारिक र सामाजिक जटिलता थपिने भन्दै सरोकारवालाहरूले चिन्ता व्यक्त गरेका छन् । सानो उमेरका बालबालिका भएका दम्पतीले समेत सम्बन्ध तोड्दा तिनको भविष्यमा समेत गम्भीर असर पर्ने देखिएको छ ।