स्कुल बस र अटो ठोक्किँदा दुई जनाको मृत्यु 

Share this
685shares
मुलुकी खबर
मुलुकी खबर
clock२०८३ भदौ ८, सोमबार १४:१९
स्कुल बस र अटो ठोक्किँदा दुई जनाको मृत्यु 

विराटनगर ।  उदयपुरको बेलका नगरपालिकामा सोमबार बिहान स्कुल बस र अटो एकआपसमा ठोक्किँदा दुई जनाको मृत्यु भएको छ भने तीन जना घाइते भएका छन् ।

सोमबार बिहान ९ः४५ बजेतिर बेलका नगरपालिका–५ जहडामा लालबजारतर्फ आउँदै गरेको को.प्र.०५–००१ ह ०६१३ नम्बरको अटो र विपरीत दिशाबाट जाँदै गरेको सफल आदर्श इङ्लिस बोर्डिङ स्कुलको को १ ख ३५१६ नम्बरको बस एकआपसमा ठोक्किएको प्रहरीले जनाएको छ ।

दुर्घटनामा गम्भीर घाइते भएका पाँच जनामध्ये दुई जनाको उपचारका क्रममा धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको प्रहरीले जनाएको छ । मृत्यु हुनेमा बेलका नगरपालिका–५ मैनीकी ३४ वर्षीया मन्दिरा मगर र अटोमा सवार अर्की एक महिला रहेकी छिन् । मृतक अर्की महिलाको पहिचान खुल्न सकेको छैन । उनीहरूको बिहान ११ः४५ बजेतिर उपचारकै क्रममा मृत्यु भएको हो ।

दुर्घटनामा अन्य तीन जना घाइते भएका छन् । घाइते हुनेमा अटो चालक बेलका–५ का २८ वर्षीय इन्द्र थापा मगर, सोही ठाउँका १८ वर्षीय रोशन मगर र मोरङ विराटनगर–१२ का १९ वर्षीय अजित गुरुङ रहेका छन् । घाइतेमध्ये अटो चालक इन्द्र र १८ वर्षीय रोशनको अवस्था गम्भीर रहेको र उनीहरूको धरानमा उपचार भइरहेको प्रहरीले जनाएको छ ।

प्रहरीले स्कुल बस र बस चालक बेलका नगरपालिका–५ घुम्नेका ३६ वर्षीय विक्रम थापालाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ ।

 

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.