सप्तकोशीमा पनि बढ्दैछ पानीको बहाव

विराटनगर । सप्तकोशी नदीमा पनि पानीको बहाव बढ्दै गएको छ । बिहीबार बिहान ६ बजे सप्तकोशीको बहाव १ लाख ४४ हजार ८ सय ६० क्यूसेक मापन गरिएको छ ।

बुधबार राति बहाव १ लाख ३२ हजार क्यूसेक मापन गरिएको थियो । पानीको बहाव बढ्दै गएसँगै कोशी ब्यारेजका १७ वटा ढोका खुला गरिएको छ । पहाडी क्षेत्रमा भएको वर्षाका कारण सहायक नदीहरुमा बाढी आउँदा कोशीको बहाव बढेको हुन सक्ने सुनसरी प्रहरीका सूचना अधिकारी डीएसपी चन्द्रबहादुर खड्काले बताए ।

Advertisement

सप्तकोशीमा खतराको तह पार गर्न बहाव २ लाख क्यूसेक नाघ्नुपर्छ । ‘बुधबारको तुलनामा बिहीबार बिहान बहाव केही बढेजस्तो देखिन्छ । तर, अहिलेसम्म अवस्था सामान्य नै छ । नदीले खतराको तह पार गरेको छैन,’ खड्काले भने । उनका अनुसार बुधबार १५ वटा ढोका खुला गरिएकोमा बिहीबार बिहान कोशी ब्यारेजका १७ वटा खुला गरिएको छ ।

पहाडी क्षेत्रमा वर्षा जारी रहेका कारण अझै बहाव बढ्न सक्ने सम्भावना रहेकाले सप्तकोशी असपासका स्थानमा बसोबास गर्दै आएकाहरुलाई सावधानी अपनाउन प्रहरीले आग्रह गरेको छ । सम्भावित बाढीलाई ध्यानमा राखेर सबैले सावधानी अपनाउनुपर्ने खड्काले बताए ।