विराटनगर महानगरले भोटेकोशीपीडितलाई २५ लाख ५१ हजार दिने

विराटनगर । भोटेकोशी नदीको बाढीबाट प्रभावित नागरिकको उद्धार, राहत र पुनःस्थापनाका लागि विराटनगर महानगरपालिकाले २५ लाख ५१ हजार रुपैयाँ सहयोग गर्ने भएको छ ।

महानगरपालिकाले विपद् व्यवस्थापन कोषबाट ११ लाख रुपैयाँ दिने निर्णय गरेको छ । बाँकी रकम जनप्रतिनिधिको सेवा–सुविधा तथा कर्मचारीको मासिक पारिश्रमिकबाट जुटाइने छ ।

Advertisement

महानगर प्रमुख नागेश कोइरालाले भोटेकोशीको विपद् सबै नेपालीको साझा पीडा भएकाले आफ्नो क्षमताअनुसार सहयोग गर्नु स्थानीय तहको दायित्व भएको बताए । उनले विपद्का बेला उद्धार, राहत र पुनःस्थापनामा सहकार्य आवश्यक रहेको बताए ।

प्रमुख प्रशासकीय अधिकृत विजयकुमार शर्माले विपद्का बेला स्थानीय तहबीचको सहयोगले राष्ट्रिय एकता र मानवीय उत्तरदायित्वलाई बलियो बनाउने बताए । महानगरपालिकाले बाढीमा ज्यान गुमाउनेप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै प्रभावित नागरिकको शीघ्र पुनःस्थापनाका लागि संघीय सरकारलाई आग्रह गरेको छ ।