रसुवा बाढीः ताप्लेजुङका ५ मध्ये ३ जना सम्पर्कमा 

ताप्लेजुङ । रसुवा र नुवाकोट क्षेत्रका त्रिशूली तथा भोटेकोशी लगायतका नदीमा आएको भीषण बाढीका कारण बेपत्ता भएका ताप्लेजुङका ५ जनामध्ये ३ जना परिवारको सम्पर्कमा आएका छन् ।

आठराई त्रिवेणी गाउँपालिका–१ निघुरादिनका ३ जना युवा शुक्रबार बिहान ३ बजे परिवारको सम्पर्कमा आएका हुन् । सो क्षेत्रका जलविद्युत आयोजनाहरूमा काम गर्न गएका पासाङतेञ्जी शेर्पा, ङिमासाङ्गे शेर्पा र पासाङ शेर्पा सम्पर्कमा आएको आठराई त्रिवेणी गाउँपालिकाकी कार्यपालिका सदस्य शान्ता गुरुङले जानकारी दिइन् ।

Advertisement

कार्यपालिका सदस्य गुरुङका अनुसार उनीहरू बाढीबाट जोगिन भागेर ज्यान जोगाउन सफल भएका हुन् । ‘भाइहरू भागेर बाँच्न सफल हुनुभएछ, आज बिहान मात्रै परिवारसँग कुराकानी भएको छ,’ गुरुङले भनिन् ।

ताप्लेजुङका ५ जना बेपत्ता भएकोमा अन्य २ जना भने अझैसम्म परिवारको सम्पर्क बाहिर रहेका छन् । नुवाकोटस्थित त्रिशूली–३  ‘बी’ जलविद्युत परियोजनामा कार्यरत पाथीभरा याङवरक गाउँपालिका–२ थेचम्बुका भीष्म चापागाईं र फुङलिङ नगरपालिका–९ हाङदेवाका दुर्गा भट्टराई (दिवस) अहिलेसम्म सम्पर्कमा नआएको परिवारजनले बताएका छन् । बेपत्ता दुवै जनाको अवस्था अज्ञात रहेकाले खोजी र सम्पर्कका लागि पहल भइरहेको छ ।