सारडा ग्रुपको विपद् सहयोग : नगददेखि सिमेन्टसम्म

काठमाडौं । बाढी प्रभावित परिवारको राहत, पुनर्स्थापना र पुनर्निर्माणका लागि व्यापारिक घटराना सारडा ग्रुप तथा आबद्ध कम्पनीहरूले नगद तथा विभिन्न सामग्री सहयोग गरेका छन् ।

सोमबार आयोजित एक कार्यक्रममा सारडा तथा राठी ग्रुपका तर्फबाट १ करोड १ लाख रुपैयाँ सहयोग गरिएको हो । उक्त सहयोग रकमको चेक अर्थमन्त्री डा. स्वर्णिम वाग्लेलाई हस्तान्तरण गरिएको छ ।

Advertisement

त्यस्तै, बाढीबाट क्षतिग्रस्त भौतिक संरचनाको पुनर्निर्माणमा प्रयोग हुने गरी शिवम सिमेन्टले ११ हजार बोरा सिमेन्ट उपलब्ध गराएको छ । सारडा ग्रुपअन्तर्गतको शिवम् होल्डिङले थप २१ लाख रुपैयाँ सहयोग गरेको सारडा ग्रुपका अध्यक्ष पवन शारडाले जानकारी दिए ।

चेक हस्तान्तरण कार्यक्रममा सारडा ग्रुपका अध्यक्ष शिवरतन सारडा, ग्रुपका निर्देशक गौरव सारडा, राठी ग्रुपका प्रबन्ध निर्देशक अनुपम राठी तथा शिवम् सिमेन्टका निर्देशक रघुनन्दन मारु सहभागी थिए । सारडा ग्रुपले विपद्बाट प्रभावित नागरिकलाई तत्काल राहत उपलब्ध गराउनुका साथै क्षतिग्रस्त संरचनाको पुनर्निर्माणमा समेत सहयोग पुर्याउने उद्देश्यले नगद, निर्माण सामग्री र खाद्यान्न सहयोग गर्दै आएको जनाएको छ ।

यसअघि पनि सारडा ग्रुपका प्रबन्ध निर्देशक पवन सारडाले एसियन थाइ फुड्सका तर्फबाट बाढी तथा प्राकृतिक विपद्बाट प्रभावित परिवारका लागि ६० लाख रुपैयाँ बराबरको खाद्यान्न तथा आवश्यक सामग्री सहयोग गरेका थिए । सारडा ग्रुप तथा आबद्ध कम्पनीहरूले विपद् प्रभावित नागरिकका लागि तत्कालीन राहतदेखि पुनर्स्थापना र पुनर्निर्माणसम्म विभिन्न चरणमा सहयोग उपलब्ध गराएका छन् ।