सुनसरीको अलनुर मस्जिदद्वारा प्रधानमन्त्री राहत कोषमा सहयोग

सुनसरी । प्राकृतिक विपत्तिका कारण मुलुकमा परेको संकटको घडीमा सुनसरीको बर्जु गाउँपालिकास्थित एक मस्जिदले आर्थिक सहयोग प्रदान गरेको छ । बर्जु गाउँपालिका–५, नहर टोलमा रहेको जामे अलनुर मस्जिदले प्रधानमन्त्री दैवी प्रकोप उद्धार कोषमा १७ हजार रुपैयाँ जम्मा गरेको हो ।

बाढी, पहिरो र डुबान जस्ता प्राकृतिक विपद्बाट प्रभावित परिवारहरूको उद्धार, राहत र पुनर्स्थापनामा सहयोग पुगोस् भन्ने उद्देश्यले मस्जिद परिवारले उक्त रकम प्रदान गरेको बताइएको छ । मस्जिदका अध्यक्ष निजम अन्सारीले विपद्को कठिन परिस्थितिमा नागरिकलाई सानो भए पनि सहयोग पुर्‍याउनु सामाजिक र मानवीय धर्म भएको बताउँदै उक्त रकम कोषमा जम्मा गरिएको जानकारी दिए ।

Advertisement

‘विपद्को यस कठिन घडीमा सहयोग र सहकार्यलाई निरन्तरता दिँदै सामाजिक उत्तरदायित्व निर्वाह गर्न हामी सदैव प्रतिबद्ध छौं,’ मस्जिद समितिले जनाएको छ ।