भोटेकोशी बाढीबारे तत्काल वैज्ञानिक अध्ययन गर्न विज्ञको सुझाव

काठमाडौं । भोटेकोशी नदीमा आएको विनासकारी बाढीको तत्काल वैज्ञानिक अध्ययन गरी क्षतिको यथार्थ मूल्याङ्कन गर्न जलवायु विज्ञहरूले सुझाव दिएका छन् ।

कृषि, वन तथा पर्यावरणमन्त्री गीता चौधरीको उपस्थितिमा मन्त्रालयमा भएको छलफलमा विज्ञहरूले बाढीलाई जलवायु संकटसँग जोडेर अध्ययन गर्नुपर्ने बताएका हुन् ।

Advertisement

विज्ञहरूले भोटेकोशी–त्रिशूली क्षेत्रमा पुनःस्थापना र पुनर्निर्माणका लागि अन्तर्राष्ट्रिय जलवायु वित्त परिचालन गर्न विशेष कोष स्थापना गर्नुपर्ने सुझाव दिएका छन् । साथै, पूर्वसूचना प्रणालीलाई थप प्रभावकारी बनाउन तथा तापक्रम वृद्धि, हिमपात र चट्टानमा देखिएका चिराबारे हिमनदी विज्ञ र वैज्ञानिकमार्फत थप अध्ययन गर्नुपर्नेमा जोड दिएका छन् ।

मन्त्री चौधरीले जलवायु न्यायलाई अधिकारका रूपमा स्थापित गर्दै आगामी कोप–३१ लगायत अन्तर्राष्ट्रिय मञ्चमा नेपालले ‘माउन्टेन एजेन्डा’लाई प्राथमिकताका साथ उठाउने बताइन् ।