वडाध्यक्षको जाहेरीका आधारमा पत्रकार तेजन खड्का पक्राउ

विराटनगर । मोरङको उर्लाबारीका पत्रकार तेजन खड्कालाई प्रहरीले शुक्रबार पक्राउ गरेको छ । उर्लाबारी नगरपालिका–७ की वडाध्यक्ष उर्मिला थापाको किटानी जाहेरीका आधारमा खड्का पक्राउ परेका हुन् ।

सामाजिक सञ्जाल फेसबुकमा आफूविरुद्ध स्टाटस लेखेको भन्दै थापाले प्रहरीमा जाहेरी दिएकी थिइन् । उक्त जाहेरीका आधारमा अदालतबाट अनुमति लिएर खड्कालाई पक्राउ गरिएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए ।

Advertisement

खड्का ब्रेक एण्ड लिंक्स (बीएल)मा कार्यरत पत्रकार हुन् । उर्लाबारीबाट पक्राउ परेका उनीमाथि जिल्ला प्रहरी कार्यालय थप अनुसन्धान अघि बढाउने जानकारी मिश्रले दिए ।

खोलाको बगरमा युवा समूहले खेलमैदान बनाउन लागेपछि ऊर्लाबारी नगरपालिका–७ को वडा कार्यालयले काम रोकेको थियो । झाडी उखालेर सबै सफा पारिसकेको अवस्थामा पार्क बनाउने भन्दै वडाले अवरोध गरेपछि युवाहरु विरोधमा उत्रिएका थिए ।

लागुऔषध सेवनकर्ताको अखडा बनेको ठाउँमा खेलमैदान बनाउन खोज्दा वडाले रोकेको भन्दै विरोध भएको हो । त्यही सन्दर्भलाई लिएर पत्रकार खड्काले ‘मैदान र पार्क नभएर रेड लाइट एरिया बनाउनु, कमिसन आउँछ’ भन्ने आशयको स्टाटस लेखेका थिए ।

उनको स्टाटसमाथि आपत्ति जनाउँदै वडाध्यक्ष थापाले विद्युतीय अपराधसम्बन्धी कसुरअन्तर्गत जाहेरी दिएकी हुन् । सोही जाहेरीका आधारमा पक्राउ गरेर अनुसन्धानको दायरामा ल्याइएको प्रहरीले जनाएको छ ।