मोरङको उर्लाबारीबाट दुई जना युवा पक्राउ

विराटनगर । मोरङको उर्लाबारीबाट प्रहरीले आइतबार दुई जना युवालाई पक्राउ गरेको छ । लागुऔषध ब्राउन सुगर (खैरो हेरोइन)सहित उनीहरु पक्राउ परेका हुन् ।

पक्राउ पर्नेमा उर्लाबारी नगरपालिका–२ का ३१ वर्षीय सुकराज दर्जी र २२ वर्षीय सुदीप धिमाल रहेका छन् । उर्लाबारी–२ बल्लु चोकस्थित आफ्नै घरको कोठाबाट लागुऔषधको कारोबार गर्ने गरेको सूचनाका आधारमा इलाका प्रहरी कार्यालय उर्लाबारीको टोलीले दर्जीको घरमा छापा हानेको थियो ।

Advertisement

घरको कोठा खानतलासी गर्दा १९ वटा पोका बनाएर सिरानीमुनि राखेको अवस्थामा १ ग्राम ८० मिलिग्राम ब्राउन सुगर बरामद भएको मोरङ प्रहरीका सूचना अधिकारी डीएसपी मकेन्द्रकुमार मिश्रले बताए । उनका अनुसार ब्राउन सुगर बरामद भएपछि दर्जीलाई पनि पक्राउ गरिएको छ ।

त्यस्तै, धिमालको शरीर खानतलासी गर्दा साथबाट १ ग्राम ब्राउन सुगर बरामद भएको मिश्रले बताए । कालो प्लास्टिकमा १९ वटा पोका बनाएर पाइन्टको गोजीमा राखेको अवस्थामा ब्राउन सुगर फेला परेपछि धिमाललाई पनि पक्राउ गरिएको जानकारी उनले दिए ।

पक्राउ परेकाहरुलाई इलाका प्रहरी कार्यालय उर्लाबारीमा राखेर इन्स्पेक्टर नवीन वली नेतृत्वको टोलीले थप अनुसन्धान गरिरहेको छ । उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।