राधाकृष्ण रथयात्रामा उठ्यो २ लाख ८२ हजार भेटी, भोटेकोशी बाढीपीडितका लागि पठाइने

विराटनगर । विराटनगरमा सम्पन्न ऐतिहासिक ५९औँ राधाकृष्ण रथयात्राका क्रममा श्रद्धालु भक्तजनबाट २ लाख ८२ हजार ४१८ रुपैयाँ भेटी संकलन भएको छ । उक्त भेटी बाढीपीडितको राहतमा प्रयोग गरिने भएको छ ।

रथयात्राका क्रममा संकलित भेटी रकमको आइतबार बिहान गणना गरिएको हो । श्रीराधाकृष्ण रथयात्रा मूल समारोह समितिका संयोजक कैलाश रेग्मीका अनुसार भक्तजनबाट कुल २ लाख ८२ हजार ४१८ रुपैयाँ संकलन भएको छ ।

Advertisement

समितिले यसपटक रथयात्रामा संकलित भेटीलाई धार्मिक प्रयोजनमा मात्र खर्च नगरी विपद्मा परेका नागरिकको सहयोगमा उपयोग गर्ने निर्णय लिएको हो । संकलित सम्पूर्ण रकम प्रधानमन्त्री दैवी प्रकोप उद्धार राहत कोषमा जम्मा गरिने जानकारी रेग्मीले दिए ।

भोटेकोशी नदी तथा तल्लो तटीय क्षेत्रमा गत भदौ १० गते आएको विनाशकारी बाढीबाट ठूलो धनजनको क्षति भएपछि प्रभावित नागरिकको राहत तथा पुनःस्थापनाका लागि विभिन्न क्षेत्रबाट सहयोग जुटिरहेको छ । सोही अभियानमा सहयोग पुर्याउने उद्देश्यले रथयात्रामा संकलित भेटी रकम बाढीपीडितका लागि प्रदान गर्ने निर्णय भएको रेग्मीले बताए ।

रथयात्राका क्रममा बाढीपीडितका लागि तीनवटा छुट्टाछुट्टै दानपेटिका राखिएको थियो । त्यसबाहेक खट र रथमा चढाइएको रकमसमेत बाढीपीडितका लागि उपलब्ध गराइने भएको छ ।

रथयात्रामा हुने अत्यधिक भिडभाड र सुरक्षा व्यवस्थाका कारण दर्शनार्थीले सिधै खट तथा रथमा भेटी चढाउन नपाउने भएकाले राहत संकलनका लागि छुट्टै दानपेटिका राखिएको समितिका संयोजक रेग्मीले बताए । उनका अनुसार रथयात्राका क्रममा श्रद्धालु भक्तजनले आस्थापूर्वक चढाएको भेटीलाई यसपटक सामाजिक सेवामा लगाउने निर्णय गरिएको हो ।

‘रथयात्रामा श्रद्धालु भक्तजनबाट संकलन भएको भेटीलाई यसपटक सामाजिक सेवामा प्रयोग गर्ने निर्णय गरेका छौँ । संकलित सम्पूर्ण रकम प्रधानमन्त्री दैवी प्रकोप उद्धार राहत कोषमा जम्मा गरी भोटेकोशी बाढीपीडितको राहतमा सहयोग पुग्ने विश्वास लिएका छौँ,’ रेग्मीले भने ।

समितिले धार्मिक आस्थासँग जोडिएको रथयात्राबाट संकलित रकम विपद्मा परेका नागरिकको सहयोगमा प्रयोग गरेर धार्मिक कार्यक्रमसँगै सामाजिक उत्तरदायित्वको सन्देश दिन खोजेको छ । विराटनगरमा हरेक वर्ष श्रीकृष्ण जन्माष्टमीका भोलिपल्ट आयोजना हुँदै आएको राधाकृष्ण् रथयात्रा यस वर्ष ५९औँ संस्करणका रूपमा सम्पन्न भएको हो ।

रथयात्रामा ठूलो संख्यामा श्रद्धालु भक्तजनको सहभागिता रहेको थियो । रथयात्राका क्रममा संकलित भेटी रकम विपद्मा परेका नागरिकका लागि प्रदान गर्ने निर्णयले धार्मिक आस्थासँगै मानवीय सहयोग र सामाजिक उत्तरदायित्वलाई समेत जोडेको समितिको भनाइ छ ।