मोरङ प्रहरीको ‘हटलाइन’ अस्थायी रूपमा बन्द, वैकल्पिक नम्बरको व्यवस्था

विराटनगर । जिल्ला प्रहरी कार्यालय मोरङले सञ्चालन गर्दै आएको १०० नम्बरको प्रहरी ‘हटलाइन’ सेवा अस्थायी रूपमा अवरुद्ध हुने भएको छ ।

परिचालन कक्षमा सञ्चालनमा रहेका पाँचवटा १०० नम्बरका ‘हटलाइन’ टेलिफोनको प्राविधिक स्तरोन्नतिको काम भइरहेकाले सेवा केही समयका लागि बन्द हुने भएको हो । जिल्ला प्रहरी कार्यालय मोरङले बुधबार सूचना जारी गर्दै स्तरोन्नति कार्य अवधिभर आकस्मिक सेवा तथा प्रहरीसँग सूचना आदानप्रदान गर्न वैकल्पिक नम्बरको व्यवस्था गरिएको जनाएको छ ।

Advertisement

उक्त अवधिभर १०० नम्बरको सट्टा वैकल्पिक सम्पर्क नम्बर प्रयोग गर्न मोरङ प्रहरीले सर्वसाधारणलाई आग्रह गरेको छ । प्रहरीका अनुसार आकस्मिक अवस्थामा परिचालन कक्ष तथा ड्युटी अधिकृतको मोबाइल नम्बर ९८५२०३७९०२ र ९८५२०२६७५० मा सम्पर्क गर्न सकिनेछ । त्यसैगरी आकस्मिक सूचना पठाउन नेपाल प्रहरीको मोबाइल एपसमेत प्रयोग गर्न सकिने छ ।

सर्वसाधारण नागरिकको सुरक्षा तथा आकस्मिक सेवालाई थप प्रभावकारी, छिटो र भरपर्दो बनाउने उद्देश्यले १०० नम्बरका टेलिफोनको प्राविधिक स्तरोन्नति गर्न लागिएको मोरङ प्रहरी प्रमुख एसपी कवित कटवालले बताए । स्तरोन्नति कार्य सम्पन्न भएपछि १०० नम्बरको प्रहरी हटलाइन सेवा थप सहज र सुदृढ रूपमा सञ्चालनमा आउने जानकारी उनले दिए ।

१०० नम्बर सेवा अवरुद्ध हुँदा सर्वसाधारणमा केही असुविधा परे पनि आकस्मिक अवस्थामा वैकल्पिक सम्पर्क नम्बर प्रयोग गर्न अनुरोध गरिएको एसपी कटवालको भनाइ छ ।