श्रीलंकालाई ७२ रनले हराउँदै भारतले जित्यो आठौँ महिला एसिया कप

भारतले श्रीलंकालाई ७२ रनले पराजित गर्दै महिला एसिया कप क्रिकेटको उपाधि जितेको छ। योसँगै भारतले प्रतियोगिताको इतिहासमा कीर्तिमानी आठौँ पटक उपाधि जितेको हो। भारत प्रतियोगिताभर अपराजित रह्यो।

२०२४ को फाइनलमा श्रीलंकासँग पराजित भएको भारतले यसपटक त्यसको बदला लिँदै शानदार जित निकालेको हो। यो भारतको लगातार १०औँ फाइनल सहभागिता पनि हो। दुबई अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको भारतले निर्धारित २० ओभरमा ५ विकेट गुमाएर १८३ रन बनायो। भारतका लागि शेफाली वर्माले ६८ र स्मृति मन्धानाले ५९ रन बनाए।

Advertisement

वर्माले २४ बलमै अर्धशतक पूरा गर्दै महिला टी–२० एसिया कपको इतिहासमा सबैभन्दा छिटो अर्धशतक बनाउने कीर्तिमान कायम गरिन्। उनले प्रतियोगितामा ५ खेलबाट २३६ रन बनाउँदै तीन अर्धशतक पूरा गरिन्।

वर्मा र मन्धानाले पहिलो विकेटका लागि १३० रनको साझेदारी गरे। मन्धानाले ३९ बलमा ५९ रन बनाइन्। उनी रनआउट भएपछि भारतले केही विकेट गुमाए पनि जी कामालिनीको आक्रामक ब्याटिङसँगै १८३ रनको बलियो योगफल बनायो।

१८४ रनको लक्ष्य पछ्याएको श्रीलंका भने भारतीय स्पिन आक्रमणसामु टिक्न सकेन। दीप्ति शर्मा र श्री चारानीले श्रीलंकाको ब्याटिङ क्रम ध्वस्त पारे। दीप्तिले कप्तान चामारी अटापट्टु र विष्मी गुणारत्नेलाई आउट गरिन् भने चारानीले चार विकेट लिइन्। उनले कभिशा दिलहारी र निलाक्षिका सिल्भासहित महत्वपूर्ण विकेट लिएपछि श्रीलंका दबाबमा परेको थियो।

अन्ततः श्रीलंका १११ रनमै अलआउट भयो। भारतले ७२ रनको फराकिलो जितसँगै आठौँ पटक महिला एसिया कपको उपाधि आफ्नो नाममा गर्‍यो।