प्रधानमन्त्रीसँगको छलफललगत्तै पक्राउ परे गाउँपालिका अध्यक्ष

काठमाडौं । प्रधानमन्त्री बालेन्द्र (बालेन) शाहले बाढी प्रभावित क्षेत्रका जनप्रतिनिधिहरूसँग गरेको छलफलमा सहभागी भएर बाहिरिएका नुवाकोटको किस्पाङ गाउँपालिका अध्यक्ष वीरबल तामाङ सिंहदरबारबाटै पक्राउ परेका छन् ।

प्रधानमन्त्रीसँगको छलफल सकेर सिंहदरबारको गेटबाट बाहिरिने क्रममा प्रहरीले तामाङलाई नियन्त्रणमा लिएको हो । उनी बाढी प्रभावित क्षेत्रका समस्याका बारेमा प्रधानमन्त्रीसँग छलफल गर्न सोमबार सिंहदरबार पुगेका थिए ।

Advertisement

जिल्ला प्रहरी परिसर काठमाडौंका एसएसपी दिलिप घिमिरेका अनुसार तामाङलाई बैंकिङ कसुरसम्बन्धी मुद्दामा पक्राउ गरिएको हो । पक्राउपछि उनलाई दरबारमार्ग प्रहरी परिसरमा बुझाइएको जानकारी उनले दिए ।

तामाङलाई सिंहदरबार गेटबाटै प्रहरीले नियन्त्रणमा लिएपछि प्रधानमन्त्रीसँगको छलफलमा सहभागी भएर फर्किंदै गरेका जनप्रतिनिधि पक्राउ परेको विषय चर्चामा आएको छ । प्रधानमन्त्री शाहले सोमबार बाढी प्रभावित क्षेत्रका जनप्रतिनिधिहरूसँग प्रभावित क्षेत्रको अवस्था, समस्या र आवश्यक सहयोगका बारेमा छलफल गरेका थिए ।

तामाङ पनि उक्त छलफलमा सहभागी थिए । प्रधानमन्त्रीसँगको छलफललगत्तै उनी पक्राउ परेका हुन् ।