भोटेकोशी बाढी : ५ हजारभन्दा बढी अझै बेपत्ता, १ हजार ३९५ शव भेटिए

काठमाडौं । भोटेकोशी बाढीपछि हराइरहेका नागरिकको खोजी तथा उद्धार जारी रहे पनि ठूलो संख्यामा मानिस अझै सम्पर्कविहीन छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीमा परी हालसम्म १ हजार ३९५ जनाको शव फेला परेको छ भने ५ हजार १३० जना अझै बेपत्ता छन् ।

प्राधिकरणले सोमबार सार्वजनिक गरेको विवरणअनुसार सबैभन्दा धेरै शव चितवनमा भेटिएका छन् । चितवनमा ३६४, नवलपरासी पूर्वमा २३२, नवलपरासी पश्चिममा २२२, नुवाकोटमा २०२, रसुवामा १८६, गोरखामा ७७, धादिङमा ७२ र तनहुँमा ३८ जनाको शव फेला परेको छ । उपचारका क्रममा काठमाडौंमा दुई जनाको समेत मृत्यु भएको प्राधिकरणले जनाएको छ ।

Advertisement

फेला परेका शवमध्ये हालसम्म १०४ जनाको मात्र सनाखत भएको छ । सनाखत हुन बाँकी शवको पहिचानका लागि डीएनए नमुना परीक्षणसहितका प्रक्रिया अघि बढाइएको छ । आफन्तबाट संकलन गरिएको नमुना र शवबाट लिइएको नमुना मिलान गरी पहिचान गर्ने काम भइरहेको प्राधिकरणले जनाएको छ ।

बाढीपछि अहिलेसम्म १३ हजार ७३७ जनाको उद्धार गरिएको प्राधिकरणका प्रवक्ता शान्ति महतले जानकारी दिइन् । उद्धार गरिएका नागरिकमध्ये विभिन्न ३३ वटा होल्डिङ सेन्टरमा राखिएकामा नुवाकोटमा १ हजार ४९९, रसुवामा ८२५ र धादिङमा ९४ जना रहेका छन् ।

बाढीबाट प्रभावित भएका घाइते तथा बिरामीको उपचार पनि जारी छ । विभिन्न १९ अस्पतालमा ३४१ जनाको उपचार गरिएकामा २७८ जना उपचारपछि घर फर्किसकेका छन् । सुरक्षा निकायमार्फत थप ९ हजार ३५८ जनाले स्वास्थ्य उपचार सेवा लिएका छन् ।

प्रभावित क्षेत्रमा स्वास्थ्य मन्त्रालयले १५० जना परामर्शदाता परिचालन गरेको छ । बाढीका कारण घरपरिवार, आफन्त तथा बसोबास गुमाएका नागरिकमा परेको मानसिक तथा मनोसामाजिक असरलाई ध्यानमा राख्दै परामर्श सेवा सञ्चालन गरिएको हो ।

यसैबीच नेपाल प्रहरीले प्रभावित क्षेत्रमा सञ्चालन गरेका १६६ वटा सामुदायिक जनचेतना कार्यक्रममार्फत ४५ हजार २३८ जनालाई परामर्श दिएको प्राधिकरणका प्रवक्ता महतले बताइन् । बाढीपछि बेपत्ता नागरिकको खोजी, फेला परेका शवको सनाखत, उद्धार गरिएका नागरिकको व्यवस्थापन तथा प्रभावित क्षेत्रमा स्वास्थ्य र मनोसामाजिक सेवा विस्तारलाई प्राथमिकतामा राखिएको प्राधिकरणले जनाएको छ ।