विराटनगरबाट गाँजासहित युवक पक्राउ

विराटनगर । विराटनगरबाट गाँजासहित सशस्त्र प्रहरीले बुधबार दिउँसो एक युवकलाई पक्राउ गरेको छ ।

धनकुटाको सहिदभूमि गाउँपालिका–५ का १९ वर्षीय अजित राईलाई पक्राउ गरिएको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले बताए । उनका अनुसार राईलाई विराटनगर महानगरपालिका–७ भृकुटी चोकबाट पक्राउ गरिएको हो ।

Advertisement

विशेष सूचनाका आधारमा सशस्त्र प्रहरी बल नेपाल नम्बर ३ गण हेडक्वाटर कंकालिनी मोरङबाट खटिएको टोलीले इटहरीबाट विराटनगरतर्फ आउँदै गरेको बा ९६ प ४५२५ नम्बरको मोटरसाइकललाई रोकेर चेकजाँच गरेको थियो । त्यस क्रममा २ वटा कालो झोलामा राखेर लैजाँदै गरेको अवस्थामा २० किलो गाँजा बरामद भएको एसपी भण्डारीको भनाइ छ ।

गाँजा फेला परेपछि गाँजा प्याक गरिएको झोला समातेर मोटरसाइकलको पछाडि बसेका राई पनि पक्राउ गरिएको उनले बताए । मोटरसाइकल चालक भने फरार रहेकाले खोजी भइरहेको प्रहरीले जनाएको छ ।

उक्त गाँजा नेपालबाट भारततर्फ लैजान खोजिएको हुन सक्ने प्रहरीको अनुमान छ । सशस्त्र प्रहरीले बरामद गरिएको गाँजा, मोटरसाइकल र पक्राउ परेका राईलाई आवश्यक अनुसन्धान एवं कारबाहीका लागि जिल्ला प्रहरी कार्यालय मोरङमा बुझाएको छ ।