२ सयको खरिदमै १० लाखको उपहार, भदौका करदाता प्रोत्साहन उपहार घोषणा

काठमाडौं । आन्तरिक राजस्व विभागले भदौ महिनाको करदाता प्रोत्साहन उपहार सार्वजनिक गरेको छ । विभागले दुई जना ग्राहकलाई जनही १० लाख रुपैयाँको बम्पर उपहार र अन्य ३१ जनालाई जनही १ लाख रुपैयाँका दरले नगद उपहार घोषणा गरेको हो ।

विभागले यसअघि हरेक १५ दिनमा करदाता प्रोत्साहन उपहार घोषणा गर्दै आएको थियो । तर, भदौ महिनामा आएको बाढीका कारण नियमित प्रक्रियाअनुसार घोषणा गर्न नसकिएपछि मासिक रूपमा उपहार घोषणा गरिएको विभागले जनाएको छ ।

Advertisement

भदौ महिनाको बम्पर उपहार कात्यानी पोलिक्लिनिक र सुनिता फेन्सी स्टोरबाट खरिद गर्ने दुई ग्राहकले पाएका छन् । कात्यानी पोलिक्लिनिकबाट २ सय रुपैयाँको सामान खरिद गर्ने ग्राहकलाई १० लाख रुपैयाँको उपहार परेको छ । त्यस्तै, सुनिता फेन्सी स्टोरबाट ७ हजार रुपैयाँको सामान खरिद गर्ने ग्राहकले पनि १० लाख रुपैयाँको बम्पर उपहार जितेका छन् ।

त्यसैगरी, विभागले अन्य ३१ जना ग्राहकलाई दैनिक १ लाख रुपैयाँका दरले वितरण हुने नगद उपहारका लागि छनोट गरेको छ । विभागले करदाता तथा उपभोक्तालाई विद्युतीय माध्यमबाट कारोबार गर्न प्रोत्साहित गर्ने उद्देश्यले यस्तो प्रोत्साहन उपहार कार्यक्रम सञ्चालन गर्दै आएको छ ।