दुई महिनामा १ खर्ब ८४ अर्ब राजस्व, लक्ष्यभन्दा ३० अर्ब कम

काठमाडौं । भोटेकोशीमा आएको बाढीका कारण उत्तरी नाकामा अवरोध देखिए पनि चालु आर्थिक वर्षको सुरुआती दुई महिनामा सरकारले अघिल्लो वर्षको सोही अवधिभन्दा बढी राजस्व संकलन गरेको छ । तर, सरकारले निर्धारण गरेको लक्ष्यअनुसार भने राजस्व उठ्न सकेको छैन ।

अर्थ मन्त्रालयका अनुसार चालु आर्थिक वर्ष २०८३–८४ को साउन र भदौमा १ खर्ब ८४ अर्ब ५८ करोड रुपैयाँ राजस्व संकलन भएको छ । गत आर्थिक वर्ष २०८२–८३ को भदौसम्म १ खर्ब ५८ अर्ब ७१ करोड रुपैयाँ राजस्व संकलन भएको थियो । यसरी तुलना गर्दा यस वर्षको दुई महिनामा राजस्व संकलन अघिल्लो वर्षभन्दा करिब २५ अर्ब ८७ करोड रुपैयाँले बढी हो ।

Advertisement

भदौ महिनामा मात्रै ९१ अर्ब ३८ करोड रुपैयाँ राजस्व संकलन भएको छ । गत आर्थिक वर्षको सोही महिनामा ७३ अर्ब ६१ करोड रुपैयाँ राजस्व उठेको थियो । गत वर्ष भदौको अन्तिम साता भएको जेनजी आन्दोलनका कारण राजस्व संकलन प्रभावित भएको थियो ।

राजस्व संकलन बढे पनि लक्ष्यअनुसारको प्रगति भने कमजोर देखिएको छ । अर्थ मन्त्रालयका अनुसार साउन–भदौमा २ खर्ब १४ अर्ब ८१ करोड रुपैयाँ राजस्व उठाउने लक्ष्य राखिएको थियो । तर, १ खर्ब ८४ अर्ब ५८ करोड रुपैयाँ मात्रै संकलन हुँदा लक्ष्यको ८५.९३ प्रतिशत हासिल भएको छ ।

भदौ महिनाका लागि मात्रै ९६ अर्ब ८८ करोड रुपैयाँ राजस्व संकलन गर्ने लक्ष्य थियो । त्यसको तुलनामा ९१ अर्ब ३८ करोड रुपैयाँ उठेको छ । अर्थात्, मासिक लक्ष्यको ९४.३३ प्रतिशत राजस्व संकलन भएको हो ।

भदौ ३१ गते मात्रै ५ अर्ब ५८ करोड रुपैयाँ राजस्व संकलन भएको मन्त्रालयको तथ्यांक छ । गत आर्थिक वर्षको भदौसम्म सरकारले २ खर्ब १८ अर्ब रुपैयाँ राजस्व उठाउने लक्ष्य राखेको भए पनि १ खर्ब ५८ अर्ब रुपैयाँ मात्रै संकलन भएको थियो ।

चालु आर्थिक वर्षमा सरकारले कुल १५ खर्ब ८० अर्ब ३२ करोड रुपैयाँ राजस्व संकलन गर्ने लक्ष्य लिएको छ । तर, आर्थिक वर्षको सुरुआतमै रसुवा–भोटेकोशी क्षेत्रमा आएको बाढीका कारण उत्तरी नाकामा परेको अवरोधले व्यापार तथा आयात प्रभावित भएकाले समग्र राजस्व लक्ष्यमा समेत असर पर्न सक्ने देखिएको छ ।