अन्तर्राष्ट्रिय उडानको नयाँ अध्याय, फ्लाई दुबईले थाल्दैछ नियमित सेवा

कास्की । पोखरा अन्तर्राष्ट्रिय विमानस्थलबाट लामो समयपछि नियमित अन्तर्राष्ट्रिय हवाई सेवा सञ्चालनमा आउँदैछ । फ्लाई दुबईले आज (बुधबार)देखि दुबई–पोखरा–दुबई रुटमा नियमित उडान सुरु गर्न लागेको हो ।

नियमित उडान सुरु हुँदा अन्तर्राष्ट्रिय उडानको नयाँ अध्याय थपिने छ । अन्तर्राष्ट्रिय विमानस्थल सञ्चालनमा आएको लामो समयसम्म नियमित विदेशी उडान हुन नसकिरहेका बेला फ्लाई दुबईको सेवाले पोखराको पर्यटन तथा व्यावसायिक क्षेत्रमा नयाँ आशा जगाएको छ । विमानस्थलबाट अन्तर्राष्ट्रिय उडान नियमित बनाउन आवश्यक पूर्वाधार तथा सेवा व्यवस्थापनको काम पूरा भइसकेको विमानस्थलका महाप्रबन्धक जगन्नाथ निरौलाले बताए ।

Advertisement

उनका अनुसार फ्लाई दुबईको विमान बुधबार साँझ ६ः१५ बजे पोखरा अवतरण गर्नेछ । पोखराबाट यात्रु लिएर साँझ ७ः१५ बजे दुबईका लागि उडान भर्नेछ । विमानलाई पोखरा विमानस्थलमा पानीको फोहराले स्वागत गर्ने तयारी गरिएको छ ।

विमानस्थलमा अध्यागमन, भन्सार, कार्गो तथा यात्रु सेवासहित अन्तर्राष्ट्रिय उडानका लागि आवश्यक सबै संयन्त्र तयारी अवस्थामा रहेको निरौलाले बताए । ‘विमानस्थलबाट प्रवाह गर्नुपर्ने सम्पूर्ण तयारीका काम पूरा भएका छन् । विमानस्थल सञ्चालनपछि केही वायु सेवा कम्पनीले अन्तर्राष्ट्रिय उडान गरे पनि त्यसले निरन्तरता पाउन सकेन । अहिले दुबईका लागि दैनिक नियमित उडान सुरु हुन लागेको अवस्थामा हामी उत्साहित छौँ,’ उनले भने ।

फ्लाई दुबईबाट पोखरा आउने यात्रु तथा पोखराबाट दुबई जाने यात्रुलाई पर्यटन व्यवसायीले स्वागत तथा बिदाइ गर्ने तयारी गरेका छन् । यात्रुलाई खादा र मालासहित स्वागत गर्ने कार्यक्रमसमेत तय गरिएको छ ।

पोखरा विमानस्थल भन्सार कार्यालयले पनि अन्तर्राष्ट्रिय उडानसँग सम्बन्धित आवश्यक काम पूरा गरेको जनाएको छ । कार्यालय प्रमुख हरि भण्डारीका अनुसार राजस्व संकलन, यात्रुको जाँचपास तथा निकासी–पैठारीसँग सम्बन्धित कामका लागि आवश्यक व्यवस्थापन मिलाइएको छ ।

‘राजस्व संकलन, वैध व्यापारलाई सहजीकरण तथा यात्रुको जाँचपास र निकासी–पैठारीको काम हामी गर्छौं । त्यसका लागि आवश्यक सबै तयारी र व्यवस्थापन मिलाइसकिएको छ,’ उनले भने ।

फ्लाई दुबईको सेवा पोखराको अन्तर्राष्ट्रिय हवाई सम्पर्क विस्तारका लागि महत्वपूर्ण हुने पर्यटन क्षेत्रको अपेक्षा छ । पोखरा पर्यटन परिषद्का पूर्वअध्यक्ष पोमनारायण श्रेष्ठले दुबई विश्वकै प्रमुख हवाई ट्रान्जिट हब भएकाले पोखरा–दुबई उडानले अन्य अन्तर्राष्ट्रिय गन्तव्यसँग पनि पोखरालाई जोड्न सक्ने बताए ।

फ्लाई दुबईले दुबईबाट १२० भन्दा बढी गन्तव्यमा उडान गर्ने भएकाले पोखराको अन्तर्राष्ट्रिय हवाई सेवाले दीर्घकालीन निरन्तरता पाउने आधार बन्न सक्ने श्रेष्ठको भनाइ छ । ‘फ्लाई दुबईको विश्वका धेरै सहरमा आफ्नै उडान छ । यसबाहेक दुबई विश्वका धेरै सहरका लागि एयर ट्रान्जिट हब हो । यसबाट पोखराको अन्तर्राष्ट्रिय उडानलाई दीर्घकालीन बनाउन सकिन्छ,’ उनले भने ।

रोजगारी तथा अध्ययनका लागि ठूलो संख्यामा नेपाली दुबई जाने भएकाले पोखराबाट सिधा उडान सुरु हुँदा यात्रुलाई समेत सहज हुने श्रेष्ठले बताए ।

उडान सञ्चालनका क्रममा सुरक्षा व्यवस्थालाई पनि प्राथमिकतामा राखिएको छ । जिल्ला सुरक्षा समितिले विमानस्थलको निरीक्षण गरी आवश्यक सुरक्षा प्रबन्धका बारेमा जानकारी लिएको छ । प्रमुख जिल्ला अधिकारी कुमानसिंह गुरुङले विमानस्थलमा अन्तर्राष्ट्रिय उडानका लागि आवश्यक सुरक्षा व्यवस्था मिलाइएको बताए ।

पोखरा अन्तर्राष्ट्रिय विमानस्थल अंग्रेजी नयाँ वर्षको अवसर पारेर २०७९ पुस १७ गते सञ्चालनमा आएको थियो । सञ्चालनपछि केही अन्तर्राष्ट्रिय उडान भए पनि नियमितता पाउन नसकेको विमानस्थलमा फ्लाई दुबईको दैनिक सेवाले अन्तर्राष्ट्रिय हवाई सम्पर्कलाई निरन्तरता दिनेछ ।