लायन्स क्लब अफ विराटनगर शुभमकाे  २५ औँ पदस्थापन सम्पन्न

विराटनगर । लायन्स क्लब अफ विराटनगर शुभमको २५ औँ पदस्थापन कार्यक्रम सम्पन्न भएको छ । क्लबको नयाँ कार्यकाल जुलाई १ तारिखदेखि प्रारम्भ भएको हो ।

कार्यक्रममा डिस्ट्रिक्ट गभर्नर लीलाप्रसाद चिमरियाले लायन्स क्लब अफ विराटनगर शुभमकी अध्यक्ष शारदा दाहालसहित नयाँ कार्यसमितिका पदाधिकारीलाई पदस्थापन गराएका थिए । पदस्थापनपछि अध्यक्ष दाहालले क्लबले विगतदेखि निरन्तर गर्दै आएको सेवामूलक अभियानलाई आगामी दिनमा थप प्रभावकारी र सशक्त बनाउने प्रतिबद्धता व्यक्त गरिन् ।

अध्यक्ष दाहालका अनुसार क्लबले रक्तदान, वृक्षारोपण, खाद्यान्न वितरण, ज्येष्ठ नागरिक सेवा, मानव सेवा आश्रममा भोजन, गर्भवती महिलालाई पोषणयुक्त खाद्यान्न वितरण तथा लागुऔषधविरुद्ध सचेतनामूलक कार्यक्रमलगायत विभिन्न सामाजिक सेवाका कार्य गर्दै आएको छ । साथै ‘शुभम् माया घर’ हस्तान्तरणलगायतका सेवामूलक गतिविधि पनि सम्पन्न भइसकेका छन् ।

उनले आगामी दिनमा पनि समाजका आवश्यकता पहिचान गर्दै अझ प्रभावकारी र सेवामूलक कार्यक्रम सञ्चालन गर्ने प्रतिबद्धता व्यक्त गरिन् ।

कार्यक्रममा अध्यक्ष दाहालले क्लबका सदस्यहरूलाई डिस्ट्रिक्टका विभिन्न महत्त्वपूर्ण जिम्मेवारी प्रदान गरिएकोमा डिस्ट्रिक्टप्रति आभार व्यक्त गर्दै आगामी दिनमा पनि आवश्यक सल्लाह, सुझाव र मार्गदर्शन प्राप्त हुने विश्वास व्यक्त गरिन् ।