व्यवसायीका समस्या र सार्वजनिक–निजी साझेदारीमा जोड: अध्यक्ष श्रेष्ठ

विराटनगर । नेपाल उद्योग वाणिज्य महासंघ (एफएनसीसीआइ) का केन्द्रीय अध्यक्ष अञ्जन श्रेष्ठले उद्योग–व्यवसाय क्षेत्रका समस्या समाधान र आर्थिक गतिविधि चलायमान बनाउन सरकार र निजी क्षेत्रबीच प्रभावकारी सहकार्य आवश्यक रहेको बताएका छन् ।

अध्यक्ष पद सम्हालेपछि पहिलो पटक कोशी प्रदेश पुगेका श्रेष्ठलाई कोशी प्रदेश महासंघका अध्यक्ष राजेन्द्र राउतले स्वागत तथा सम्मान गरेका हुन् । नेपाल सरकारद्वारा इटहरीमा आयोजित सीप तथा रोजगार मेलामा सहभागी हुने क्रममा कोशी प्रदेश महासंघको सचिवालय पुगेका श्रेष्ठले भेटघाट तथा छलफलमा यस्तो धारणा राखेका हुन् ।

Advertisement

कार्यक्रममा कोशी प्रदेश महासंघका अध्यक्ष राउतले पछिल्लो समय देशमा देखिएका विभिन्न विपद्का कारण व्यवसायी थप मारमा परेको बताए । विशेषगरी चाडपर्वका समयमा अपेक्षाअनुसार व्यापार–व्यवसाय सञ्चालन हुन नसक्दा व्यवसायी प्रत्यक्ष प्रभावित भएको उल्लेख गर्दै उनले यसको असर बैंकको ब्याज भुक्तानीदेखि सरकारको राजस्व संकलनसम्म परेको बताए ।

चुनौतीपूर्ण अवस्थाका बाबजुद कोशी प्रदेश महासंघले व्यवसायीलाई हौसला प्रदान गर्दै सुरक्षित र निर्बाध रूपमा व्यवसाय सञ्चालनका लागि आवश्यक समन्वय तथा सहजीकरण गरिरहेको अध्यक्ष राउतले प्रस्टाए । उनले प्रदेश महासंघको आफ्नै भवन निर्माण अन्तिम चरणमा पुगेको र आगामी एक वर्षभित्र नयाँ भवनबाटै सचिवालय सञ्चालन गर्ने तयारी भइरहेको जानकारी दिए ।

केन्द्रीय अध्यक्ष श्रेष्ठले कोशी प्रदेश महासंघले गरेको स्वागत तथा सम्मानप्रति आभार व्यक्त गर्दै महासंघ र कोशी प्रदेश सरकारबीचको सम्बन्ध सुमधुर रहेकाले प्रदेशमा व्यावसायिक गतिविधि सञ्चालनका लागि सहज वातावरण बनेको बताए ।

उनले आगामी दिनमा सीपमूलक तालिमलाई थप प्रभावकारी बनाउँदै महिला उद्यमीको विकास र प्रवर्द्धनका लागि विशेष कार्यक्रम सञ्चालन गर्न प्रदेश महासंघलाई आग्रह गरे ।

स्थानीय तहमा उपलब्ध स्रोत, साधन र सम्भावनाको अधिकतम उपयोग गर्दै उद्योग–व्यवसाय प्रवर्द्धन गर्न उद्योग वाणिज्य संघ र स्थानीय सरकारबीच सार्वजनिक–निजी साझेदारी (पीपीपी) को अवधारणामा काम गर्नुपर्नेमा अध्यक्ष श्रेष्ठले जोड दिए । यसका लागि नगरपालिका महासंघ र गाउँपालिका महासंघसँग समेत आवश्यक छलफल तथा वार्ता भइरहेको उनले जानकारी दिए ।

कार्यक्रममा महासंघका केन्द्रीय सदस्य, प्रदेश महासंघका पदाधिकारी तथा विभिन्न जिल्ला–नगर उद्योग वाणिज्य संघका अध्यक्ष एवं पदाधिकारीहरूको सहभागिता रहेको थियो ।