सुनसरीको हरिनगर गाउँपालिकाको सिफारिसमा निर्माण कम्पनी कालोसूचीमा

विराटनगर । सुनसरीको हरिनगर गाउँपालिकाको सिफारिसमा एक निर्माण कम्पनी दुई वर्षका लागि कालोसूचीमा परेको छ । सार्वजनिक खरिद अनुगमन कार्यालयले विभिन्न सार्वजनिक निकायको सिफारिसमा पाँच निर्माण व्यवसायी तथा आपूर्तिकर्ता कम्पनीलाई कालोसूचीमा राखेको हो ।

कार्यालयले असोज २६ गतेको निर्णयअनुसार सार्वजनिक खरिद ऐन, २०६३ को दफा ६३ को उपदफा (१) बमोजिम ती कम्पनीलाई कालोसूचीमा राखेको जनाएको छ ।

कालोसूचीमा पर्नेमा महोत्तरीको जलेश्वरस्थित दिपक निर्माण सेवा पनि छ । सोमन्त यादव मुख्य व्यक्ति रहेको उक्त कम्पनीलाई हरिनगरा गाउँपालिकाको सिफारिसमा दुई वर्षका लागि कालोसूचीमा राखिएको हो ।

त्यस्तै, कैलालीको धनगढीस्थित बराहा डेभलपर्स प्रालि (साविक राजेन्द्र निर्माण सेवा प्रालि) लाई तीन वर्षका लागि कालोसूचीमा राखिएको छ । भीमबहादुर साउँद मुख्य व्यक्ति रहेको उक्त कम्पनीलाई अछामको कमलबजार नगरपालिकाको सिफारिसमा कारबाही गरिएको हो ।

रुपन्देहीको बुटवलस्थित सज्ल नेपाल मुख्य व्यक्ति रहेको अभियन्ता कन्स्ट्रक्सन प्रालि पनि दुई वर्षका लागि कालोसूचीमा परेको छ । भैरहवा बहुमुखी क्याम्पसको सिफारिसमा उक्त कम्पनीलाई कालोसूचीमा राखिएको हो ।

यसैगरी, तनहुँको शुक्लागण्डकीस्थित रामकुमार श्रेष्ठ मुख्य व्यक्ति रहेको फूलबाराही डेभलपर्स एन्ड इन्भेस्टमेन्ट प्रालिलाई पशु रोग अन्वेषण प्रयोगशाला, पोखराको सिफारिसमा दुई वर्षका लागि कालोसूचीमा राखिएको छ ।

बाराको प्रसौनी बहुप्राविधिक शिक्षालयको सिफारिसमा पर्साको कालिकामाईस्थित अरविन्द चौरासिया मुख्य व्यक्ति रहेको प्रिन्स कन्स्ट्रक्सन पनि दुई वर्षका लागि कालोसूचीमा परेको छ ।

कालोसूचीमा परेका कम्पनीले तोकिएको अवधिभर सार्वजनिक निकायका कुनै पनि खरिद प्रक्रियामा सहभागी हुन पाउने छैनन् ।