कांग्रेस सहमहामन्त्रीमा शाही निर्वाचित

काठमाडौं । नेपाली कांग्रेसको सहमहामन्त्री (पिछडिएको क्षेत्रतर्फ) मा जीवनबहादुर शाही निर्वाचित भएका छन्। चार प्रतिस्पर्धीलाई पछि पार्दै शाहीले उक्त पदमा जित हासिल गरेका हुन् ।

कांग्रेसको कर्णाली प्रदेश संसदीय दलका नेतासमेत रहेका शाहीले ३ हजार ९०६ मत प्राप्त गरेको निर्वाचन पोर्टलमा उल्लेख छ ।

उनका निकटतम प्रतिस्पर्धी जनकराज गिरीले १ हजार ३७० मत प्राप्त गरेका छन् । अन्य प्रतिस्पर्धी नारायणप्रसाद भट्टराई, राजन कुँवर र रामबहादुर विष्ट थिए ।

निर्वाचन समितिले भने शाहीको जितको औपचारिक घोषणा गरिसकेको छैन । समितिका सदस्यसचिव राजु कटवालले मतगणना सकिएको र प्राप्त मत यकिन गर्ने काम भइरहेको जानकारी दिए ।

शाही २०७८ मा सम्पन्न कांग्रेसको १४औँ महाधिवेशनमा पनि सहमहामन्त्री (पिछडिएको क्षेत्रतर्फ) का उम्मेदवार थिए । त्यतिबेला उनी बद्रीप्रसाद पाण्डेसँग पराजित भएका थिए । दोस्रो प्रयासमा शाही सहमहामन्त्री बन्न सफल भएका हुन् ।