बिरामीलाई सहज र गुणस्तरीय सेवा दिन ६ स्वास्थ्य प्रतिष्ठानसँग कार्यसम्पादन सम्झौता

काठमाडौं । अस्पतालको सरसफाइदेखि शय्या उपलब्धता र उपचारका लागि हुने प्रतीक्षा समयसम्म सुधार गर्दै बिरामीलाई सहज, गुणस्तरीय र सम्मानजनक स्वास्थ्य सेवा उपलब्ध गराउने लक्ष्यसहित स्वास्थ्य तथा खाद्य स्वच्छतामन्त्री निशा मेहताले ६ वटा स्वास्थ्य विज्ञान प्रतिष्ठानका उपकुलपतिसँग कार्यसम्पादन सम्झौता गरेकी छन् ।

मन्त्री मेहताले बिहीबार आर्थिक वर्ष २०८३/८४ का लागि चिकित्सा विज्ञान राष्ट्रिय प्रतिष्ठान (न्याम्स), पाटन स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, बीपी कोइराला स्वास्थ्य विज्ञान प्रतिष्ठान, राप्ती स्वास्थ्य विज्ञान प्रतिष्ठान र पोखरा स्वास्थ्य विज्ञान प्रतिष्ठानका उपकुलपतिसँग सम्झौता गरेकी हुन् ।

सम्झौताअनुसार अस्पतालमा सरसफाइ तथा स्वच्छता कायम गर्ने, बिरामीलाई आवश्यकताअनुसार समयमै शय्या उपलब्ध गराउने र उपचारका लागि लामो समय कुर्नुपर्ने अवस्थाको अन्त्य गर्ने विषयलाई प्राथमिकतामा राखिएको छ । त्यस्तै, स्वास्थ्यकर्मीको व्यवहारलाई सेवामैत्री, जिम्मेवार र बिरामीप्रति संवेदनशील बनाउँदै सेवा प्रवाहमा सुधार ल्याउनुपर्नेमा मन्त्री मेहताले जोड दिएकी छन् ।

उनले स्वास्थ्य सेवाको गुणस्तर अभिवृद्धि, प्रभावकारी सेवा प्रवाह, संस्थागत सुशासन, पारदर्शिता र जबाफदेहिता कायम गर्दै बिरामीले सहज रूपमा उपचार पाउने वातावरण बनाउनुपर्ने बताइन्।

कार्यसम्पादन सम्झौतामार्फत प्रतिष्ठानहरूको जिम्मेवारी र लक्ष्य स्पष्ट पार्दै स्वास्थ्य सेवामा सुधार ल्याउने तथा त्यसको प्रत्यक्ष अनुभूति सेवाग्राहीले गर्न सक्ने अपेक्षा गरिएको छ।

यसैगरी, मन्त्रालयका सचिव डा. विकास देवकोटाले पनि आर्थिक वर्ष २०८३/८४ का लागि १९ वटा संघीय अस्पतालका प्रमुखसँग कार्यसम्पादन सम्झौता गरेका छन् ।