सरुवा भएका कर्मचारी पुरानै पालिकामा बसेपछि तीन पालिकाको खाता रोक्का

काठमाडौं । सरुवा भएर पनि पुरानै कार्यालयमा बस्ने र नयाँ प्रमुख प्रशासकीय अधिकृतलाई हाजिर नगराउने तीन स्थानीय तहको आर्थिक तथा प्रशासनिक जिम्मेवारी रद्द गरिएको छ । भूमि व्यवस्था, सहकारी तथा संघीय मामिला तथा सामान्य प्रशासन मन्त्रालयले जुम्लाको कनकासुन्दरी गाउँपालिका, पर्साको जिराभवानी गाउँपालिका र काठमाडौंको बुढानीलकण्ठ नगरपालिकाको आर्थिक तथा प्रशासनिक जिम्मेवारी रद्द गरेको हो ।

मन्त्रालयका अनुसार ती पालिकामा कार्यरत कर्मचारीको अन्यत्र सरुवा गरिएको भए पनि उनीहरू सरुवा भएको कार्यालयमा हाजिर नभई साबिककै पालिकामा कार्यरत रहँदै आएका थिए । त्यस्तै, नयाँ प्रमुख प्रशासकीय अधिकृतका रूपमा खटाइएका कर्मचारीलाई समेत सम्बन्धित पालिकाले हाजिर गराएका थिएनन् ।

सरुवा भएका कर्मचारी पुरानै कार्यालयमा रहिरहने र नयाँ जिम्मेवारीसहित खटाइएका प्रमुख प्रशासकीय अधिकृतलाई कामकाज गर्न नदिइएको विषयमा मन्त्रालयले यस्तो निर्णय गरेको जनाएको छ।

मन्त्रालयले नयाँ प्रमुख प्रशासकीय अधिकृतका रूपमा खटाइएका कर्मचारीलाई आर्थिक तथा प्रशासनिक जिम्मेवारीसहित तत्काल कामकाजमा लगाउन सम्बन्धित पालिकालाई निर्देशन दिएको छ।

यसैगरी, मन्त्रालयले आर्थिक जिम्मेवारी रद्द गरिएको विषयमा सम्बन्धित कोष तथा लेखा नियन्त्रक कार्यालयलाई जानकारी गराउँदै खाता सञ्चालनका लागि आवश्यक व्यवस्था मिलाउनसमेत आग्रह गरेको छ।