तमोर कोरिडोरको सडक कालोपत्रेमा ढिलाइ, ठेक्का तोड्ने चेतावनी

काठमाडौं । तमोर कोरिडोरअन्तर्गत मूलघाटदेखि सुभाङ गणेशचोकसम्मको सडक स्तरोन्नति र कालोपत्रे गर्ने काममा ढिलाइ भएपछि सडक विभागले ठेकेदार कम्पनीसँग स्पष्टीकरण मागेको छ । काममा प्रगति नगरेको भन्दै आयोजनाले १५ दिनभित्र चित्तबुझ्दो जवाफ नदिए ठेक्का अन्त्य गर्ने प्रक्रिया अघि बढाउने चेतावनी दिएको हो ।

सडक विभागको उत्तर–दक्षिण व्यापारिक मार्ग विस्तार आयोजना निर्देशनालयअन्तर्गतको चतरा–मूलघाट–सुभाङखोला सडक योजनाले एम/एस एपेक्स कन्स्ट्रक्सन कम्पनी प्रालि, मैतीदेवी काठमाडौंलाई स्पष्टीकरण सोधेको हो । उक्त कम्पनीले तमोर कोरिडोरको सो सडक खण्ड स्तरोन्नति गरी कालोपत्रे गर्ने ठेक्का पाएको थियो ।

आयोजनाले जारी गरेको सूचनाअनुसार पटक–पटक मौखिक तथा लिखित रूपमा जानकारी गराउँदा पनि निर्माण कम्पनीले लामो समयदेखि सम्झौताअनुसार काम अघि बढाएको छैन । काम सम्पन्न गर्नेतर्फ आवश्यक तदारुकता नदेखाएकाले ठेक्का अन्त्य गर्नुपर्ने अवस्था आएको आयोजनाको भनाइ छ ।

सार्वजनिक खरिद ऐन, २०६३ को दफा ५९, सार्वजनिक खरिद नियमावली, २०६४ को नियम १२८ को उपनियम (२) तथा ठेक्का सम्झौतामा उल्लिखित व्यवस्थाअनुसार कारबाही अघि बढाउन लागिएको सूचनामा उल्लेख छ ।

आयोजनाले निर्माण कम्पनीलाई १५ दिनभित्र कार्यालयमा आधिकारिक प्रतिनिधिमार्फत उपस्थित भएर ढिलाइको कारण खुलाउँदै लिखित स्पष्टीकरण पेस गर्न भनेको छ । निर्धारित समयभित्र सम्झौताअनुसार काम सम्पन्न नगरेमा वा ढिलाइबारे चित्तबुझ्दो जवाफ नदिएमा ठेक्का अन्त्य गर्ने प्रक्रिया अघि बढाइनेछ ।