१७ अर्ब डलरका पूर्वाधार परियोजना सम्मेलनमा प्रस्तुत गरिने

काठमाडौं । नेपालमा पूर्वाधार क्षेत्रमा स्वदेशी तथा विदेशी लगानी आकर्षित गर्ने उद्देश्यसहित आगामी डिसेम्बर ९ र १० गते आयोजना हुने तेस्रो नेपाल पूर्वाधार सम्मेलन–२०२६ मा करिब १७ अर्ब अमेरिकी डलर बराबरका परियोजना प्रस्तुत गरिने भएको छ।

पूर्वाधार विकास मन्त्रालय, नेपाल उद्योग परिसंघ र नेपाल निर्माण व्यवसायी महासंघको संयुक्त आयोजनामा हुने सम्मेलनमा विभिन्न क्षेत्रका महत्त्वपूर्ण पूर्वाधार परियोजना लगानीकर्तासमक्ष प्रस्तुत गरिनेछ।

काठमाडौंमा आयोजित संयुक्त पत्रकार सम्मेलनमा पूर्वाधार विकासमन्त्री सुनिल लम्सालले सम्मेलनमार्फत लगानीका सम्भावनासँगै नेपालमा भएका कानुनी तथा नीतिगत सुधारसमेत प्रस्तुत गरिने जानकारी दिए।

उनका अनुसार लगानीमैत्री वातावरण निर्माणका लागि सरकारले ५९ वटा कानुनको मस्यौदा तयार गरिसकेको छ।

सम्मेलनमा अर्थमन्त्री स्वर्णिम वाग्ले, कानुन, न्याय तथा संसदीय मामिलामन्त्री सोविता गौतमसहित निजी क्षेत्रका प्रतिनिधिहरूको सहभागिता रहनेछ। सम्मेलनले पूर्वाधार विकासमा लगानी विस्तार तथा सार्वजनिक–निजी साझेदारीका नयाँ सम्भावना पहिचान गर्ने अपेक्षा गरिएको छ।