एनपीएलः विराटनगर–पोखरा र कर्णाली–लुम्बिनी भिड्दै

काठमाडौं । नेपाल प्रिमियर लिग (एनपीएल) क्रिकेटमा बिहीबार (आज) दुई खेल हुँदै छन्। कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेलमा विराटनगर किंग्सले पोखरा एभेन्जर्स तथा कर्णाली याक्सले लुम्बिनी लाइन्ससँग प्रतिस्पर्धा गर्नेछन्।

आज दिउँसो साढे १२ बजे हुने पहिलो खेलमा विराटनगर र पोखरा आमनेसामने हुनेछन्। पाँच खेल खेलेको विराटनगरले दुई जित र तीन हारसहित चार अंक जोडेर तालिकाको छैटौँ स्थानमा छ। यता पोखराले पाँच खेलमध्ये एकमा मात्र जित निकाल्दै दुई अंकका साथ तालिकाको पुछारमा रहेको छ। त्यसैले पोखरालाई आजको खेल जित्दै आफ्नो अवस्था सुधार्ने चुनौती छ।

यसैगरी, दिउँसो साढे ४ बजे हुने दोस्रो खेलमा कर्णाली याक्स र लुम्बिनी लाइन्स भिड्नेछन्। पाँच खेलबाट दुई जित र तीन हार बेहोरेको कर्णाली चार अंकसहित सातौं स्थानमा छ। कर्णाली पनि आजको खेल जित्दै तालिकामा सुधार गर्ने लक्ष्यमा हुनेछ।

यता लुम्बिनी लाइन्स भने पाँच खेलबाट तीन जित, एक हार र वर्षाका कारण रद्द भएको एक खेलबाट अंक बाँड्दै सात अंकसहित तालिकाको तेस्रो स्थानमा छ। उत्कृष्ट लयमा रहेको लुम्बिनी आजको खेल जित्दै शीर्ष टोलीसँगको दूरी घटाउने प्रयासमा हुनेछ।