
काठमाडौं । मकवानपुरको भीमफेदी गाउँपालिका–१ भैँसे नजिकै त्रिभुवन राजपथमा बिहीबार बिहान भएको जिप दुर्घटनामा मृत्यु भएका तीन जना र घाइते सात जनाको पहिचान खुलेको छ ।
मकवानपुर प्रहरीले दिएको जानकारीअनुसार दुर्घटनामा रौतहटको चन्द्रपुर नगरपालिका–४ का ५० वर्षीय बमबहादुर वाइबा, चन्द्रनिगाहपुर नगरपालिका–४ की २२ वर्षीया जेशिका भनिने अस्मिता तिमल्सिना र सोही ठाउँकी २५ वर्षीया अनुसा लामाको मृत्यु भएको हो ।
दुर्घटनामा चन्द्रपुर नगरपालिका–३ की १६ वर्षीया निमा थिङ, ५८ वर्षीय कान्छा ध्वज, १५ वर्षीया सुमिना थिङ, चन्द्रपुर–४ का ३३ वर्षीय कालुमान लोप्चन, चन्द्रपुर–३ की १६ वर्षीया शिखा लामा, ५५ वर्षीया हरिमाया थिङ र चन्द्रपुर–४ का १९ वर्षीय बय हाङ रानामगर घाइते भएका छन् । घाइते लोप्चन जिपका चालकसमेत हुन् ।
बिहीबार बिहान करिब ८ः५५ बजे हेटौँडाबाट काठमाडौं आउँदै गरेको ना।१ ज २१४३ नम्बरको सुमो सडकबाट करिब २० देखि २५ मिटर तल खोलामा खसेर दुर्घटना भएको थियो ।
दुर्घटनाबारे थप अनुसन्धान भइरहेको प्रहरीले जनाएको छ ।

























