
विराटनगर । मोरङको पथरीशनिश्चरे नगरपालिका–१ स्थित पूर्व बसस्टेन्ड नजिकै एक पुरुष मृत फेला परेका छन् ।
मृत फेला पर्नेमा झापाको धुलाबारी–३ घर बताउने अन्दाजी ५६ वर्षीय शंकर पाँचकोटी रहेका छन् । उनी प्लास्टिकका खाली बोतल टिप्दै हिँड्ने गरेको जानकारी प्रहरीले प्राप्त गरेको छ ।
प्रहरीका अनुसार बिहीबार दिउँसो करिब १ः२० बजेतिर अंशु कला किराना पसल अगाडि बसिरहेको अवस्थामा उनी मृत फेला परेका थिए । घटनाको जानकारी प्राप्त हुनासाथ इलाका प्रहरी कार्यालय पथरीबाट इन्स्पेक्टर भीमराज राईको कमाण्डमा प्रहरी टोली घटनास्थल पुगेको थियो ।
प्रहरीले आवश्यक कानुनी प्रक्रिया पूरा गरी शवलाई पोस्टमार्टमका लागि मंगलबारेस्थित मदन भण्डारी अस्पताल एवं ट्रमा सेन्टर पठाएको छ । मृत्युको कारण खुल्न नसकेको र घटनाको थप अनुसन्धान भइरहेको प्रहरीले जनाएको छ ।

























